Ditën e sotme është mbajtur në Selanik të Greqisë Forumi i Energjisë për Evropën Juglindore, ku tema kryesore ishte Bashkëpunimi rajonal, me fokus krijimin e linjave të interkonjeksionit të energjisë elektrike dhe gazit, apo krijimin e blloqeve të përbashkëta të investimit qofshin këto në gazifikim apo në gjenerimin e energjisë.
Në Forumin e organizuar nga Dhoma e Tregtisë Amerikano – Greke dhe Shoqata greke për Ekonominë Energjetike, mori pjesë edhe ministrja e Infrastrukturës dhe Energjisë të Shqipërisë, Belinda Balluku, e cila mbajti fjalën e saj gjatë njërit prej paneleve të eventit.
Sipas ministres, Shqipëria është i vetmi vend në Ballkan, por sigurisht dhe në Evropë, i cili prodhon 100 për qind energji të rinovueshme.
“Në Forumin e Energjisë për Evropën Juglindore u diskutua për bashkëpunimin rajonal për krijimin e linjave të interkonjeksionit qofshin këto të energjisë elektrike apo linjave të interkonjeksionit të gazit, të cilat sot kanë rezultuar që janë komponentët më të fortë në të cilat duhet të ngrihet rritja ekonomike e vendeve të Ballkanit. Çfarë tjetër diskutuam gjatë këtij forumi shumë të rëndësishëm ishte dhe bashkëpunimi në fushën ekonomike midis shteteve tona, krijimi i blloqeve të përbashkëta të investimit qofshin këto në gazifikim apo në gjenerimin e energjisë elektrike. Ky fakt ne na dallon nga shtetet e tjera, por gjithashtu çfarë ne punojmë sot dhe çfarë unë kam deklaruar gjatë forumit është diversifikimi i burimeve të energjisë pasi ne na duhet që këto burime të jenë burime të mjaftueshme për kërkesat që vendi sot ka dhe për të zvogëluar dhe minimalizuar importet e energjisë që ne kemi gjatë periudhës së verës, pra gjatë kohës kur duhet më shumë energji për të dhënë të gjithë abonentëve të rrjetit”, u shpreh në përfundim të forumit ministrja Balluku.
Por pjesëmarrja e Shqipërisë dhe Maqedonisë së Veriut në këtë forum është vlerësuar edhe në një drejtim tjetër, atë të procesit të integrimit evropian, për të cilin këto dy vende presin në muajin tetor një vlerësim pozitiv nga BE.
“Pjesëmarrja e Shqipërisë dhe Maqedonisë të Veriut si dy shtete që presin në muajt në vazhdim për të pasur aksesin në negociata ishte shumë interesante pasi strategjitë e vendeve tona ballkanike janë të ngjashme dhe shkojnë të gjitha në përputhje dhe në përmbushje të të gjitha kërkesave dhe rregulloreve evropiane për sa i përket energjisë në rajonin tonë, por në të gjithë Evropën”, tha ministrja Balluku.
Forumi i Energjisë për Evropën Juglindore zhvillohet një herë në vit dhe është një forum shumë i rëndësishëm i cili jep mundësi të gjithë aktorëve në fushën e energjisë të ulen së bashku, të diskutojnë për politikat dhe për arritjet gjatë vitit pararendës, por gjithashtu të vendosin piketat për të ardhmen, për bashkëpunimin dhe për të gjitha çështjet rregullatore që Bashkimi Evropian kërkon nga shtetet anëtare.
