Mediat serbe janë rikthyer të komentojnë fatin e “Ballistit”, i cili sipas tyre pritet të mos ndodhë ekstradimi në Serbi. Ky reagim ka ardhur pikërisht pas vizitës që bëri presidenti Ilir Meta në Kroaci dhe i kërkoi informacion homologes kroate për këtë çështje. Ballisti qëndron pas hekurave prej më shumë se një viti, pasi Ismail Morina mori autorësinë për ngritjen e dronit në stadiumin e Beogradit në vitin 2014 në sfidën Serbi-Shqipëri. Raportohet se Morina ka bërë një kërkesë për azil politik në Kroaci dhe në këtë mënyrë i shpëton edhe ekstradimit në Serbi.
“Vecernje Novosti” ka bërë një reagim pasi është informuar për këtë kërkesë azili dhe shkruan: “Shqiptarët luten që Morina të bëhet nënshtetas kroat”. Po ashtu e ngre çështjen në një nivel më të lart ku shprehet se diplomatët serbë, shqiptarë dhe kroatë janë në bisedime të vazhdueshme për të zgjidhur çështjen e “Ballistit”.
Ismail Morina qëndron në burg në Dubrovnik që nga qershori, pasi u arrestua në momentin që po tentonte kalimin në pikën kufitare. Gjykata kroate fillimisht vendosi ekstradimin e tij drejt Serbisë, por ky vendim u hodh poshtë nga Gjykata e Lartë e Kroacisë. Ndërsa tani diplomatët shqiptarë po bëjnë presion të vazhdueshëm në Zagreb për të mos lejuar ekstradimin dhe të pranohet kërkesa e Morinës për azil politik dhe në këtë mënyrë parandalohet ekstradimi, sipas gazetës serbe “Novosti”.
Duke pasur parasysh se së fundmi marrëdhëniet mes Kroacisë dhe Serbisë nuk kanë qenë të shkëlqyera, kroatët mund të vendosin të mbajnë marrëdhënie të qëndrueshme me Tiranën dhe të pranojnë kërkesën e tyre. Sipas gazetës në fjalë, Serbia ka dhënë garanci se pas ekstradimit, Morinës do t’i respektohen të drejtat e tij, ndërsa shkruan me dyshim për deklaratën e “Ballistit” se ka frikë për jetën e tij nëse ekstradohet në Serbi.
“Morina është shprehur se gjoja i rrezikohet jeta në burgjet serbe”, shkruan “Novosti”, duke vijuar më tej: “Morina nuk e ka paguar provokimin që bëri në Beograd. Avokatët e Ismail Morinës supozojnë se në Serbi ai mund të dënohet me tetë vjet burg. Vëllai i Ismail Morinës ka nisur një fushatë të gjerë në Shqipëri, së bashku me tifozët shqiptarë duke kërkuar aktivizim të fortë të diplomacisë shqiptare për të ndaluar ekstradimin drejt Serbisë”.
