Kreu i grupit parlamentar të Partisë Socialiste, Taulant Balla theksoi se askush nuk i shpëton dot reformës së nisur në sistemin e drejtësisë. Duke folur për kërkesën e Prokurorisë për arrestimin e ish-ministrit të Brendshëm Saimir Tahiri, Balla shpjegoi se pritet të mblidhet Këshilli i Mandateve për të vendosur mbi fatin e Saimir Tahirit dhe për t’i hapur rrugë veprimit të Prokurorisë.
“Për këdo, për çdo rast, do ta bëjmë procedurën njëlloj. Ashtu si edhe në këtë rast siç po prisni me qëllim që beteja jonë për drejtësi dhe të mos ketë asnjë pengesë. Drejtësia është fjala jonë e vetme. Ata që kanë zgjedhur hallin për pushtet, dalin 5 minuta këtu dhe pa ditur aspak procedurën”, u shpreh Balla në një prononcim për shtyp.
Sipas tij, edhe kryetari i Kuvendit Gramoz Ruçi, nuk do të tolerojë aspak në këtë drejtim dhe sipas tij, Ruçi do të respektojë rregulloren e Kuvendit.
“Shumë shpejt kryetari i Kuvendit do të bëjë njoftimin përkatës për mbledhjen e Këshillit të Mandateve. Jam shumë i sigurt që kryetari i Kuvendit do të respektojë germë për germë rregulloren e Kuvendit. Kukuvajkat duhet ta dinë se kjo është rruga drejt reformës në drejtësi. Ne deputetët e PS-së, po bëhemi gati për të mbërritur në godinën e Kuvendit. Materiali ka dalë më parë në media se sa ka mbërritur në Kuvend. Pastaj do të ndiqet procedura, njoftohen anëtarët dhe njoftohet prokuroria dhe në seancën që përcakton rregullorja merret edhe vendimi. PS është këtu për të qëndruar në atë mesazh që i ka dhënë shqiptarëve për realizimin e reformës në drejtësi”, përfundoi Balla.
