Sikundër kishte paralajmëruar edhe më herët, deputeti socialist Taulant Balla, ka dorëzuar sot në Prokurorinë e Tiranës prova të tjera në lidhje me kallëzimin penal për kryedemokratin.
Kryetari i grupit parlamentar të PS, Taulant Balla, është paraqitur sërish sot në Prokurorinë e Tiranës për padinë ndaj kreut të PD, Lulzim Basha. Kjo lidhur me 3.4 mln euro që u kapën në Durrës, në një makinë Toyota Yaris.
“Unë e di që shumë qytetarë thonë që ja këtë punë kanë, nuk merren me hallet e njerëzve, por merren me njëri-tjetrin.
Por besoj se sot po i bëjmë një shërbim politikës shqiptare, për të ndarë përfundimisht shpifësit nga e vërteta. Dhe në rastin në fjalë unë e dija dhe ju e dini që Basha ka fobi nga këto godinat.
Dhe nuk e di që do të paraqitet, pavarësisht se burrërisht duhet të vijë të përballet. Unë do ti shkoj deri në fund këtij procesi. Dhe jam i bindur që në fund do të fitoj një vendim gjykate që nuk do të më vlejë vetëm mua, por edhe PD”.
