Sot në Kuvend do të votohet si President Bajram Begaj, aktualisht shefi i shtabit të përgjithshëm të Ushtrisë. Begaj ishte propozim i Partisë Socialiste dhe nëse zgjidhet, do të jetë Presidenti i tetë pas pluralizmit, dhe i treti që vjen me karrierë ushtarake. Më herët e kanë mbajtur postin e Kreut të Shtetit ish ushtarakë, si Alfred Moisiu dhe Bujar Nishani.
Emrin e tij e bëri publik kryetari i PS-së dhe kryeministri Edi Rama. Rama e cilësoi atë si “shëmbëlltyra e atij normaliteti, qytetarie dhe sensi të shërbimit ndaj vendit dhe njerëzve të këtij vendi për të cilin ajo zyra ka nevojë urgjente”, duke ju referuar presidentit aktual Ilir Meta, me të cilin mazhoranca ka pasur përplasje të vazhdueshme.
Në një seancë të posaçme në Kuvend, pritet që të zhvillohet raundi i katërt për të zgjedhur Kreun e ri të Shtetit, pasi tre të parat dështuan dhe opozita u tërhoq nga marrëveshja me PS-në. Për këtë raund mjaftojnë vetëm 71 vota.
Para se të shkojë në Kuvend, emri i Begajt do t’i dërgohet paraprakisht Grupit Parlamentar të PS-së, që do të mblidhet paraditen e së shtunës rreth orës 10:00 dhe nga ku do të mblidhen dhe firmat e nevojshme.
Duhen të paktën firmat e 20 deputetëve për mbështetjen e një kandidati, që më pas do të depozitohen zyrtarisht në Kuvend. Afati i përcaktuar nga Konferenca e Kryetarëve është ora 12:00 sot, ndërsa më pas, në orën 16:00 do të mblidhet Komisioni i Ligjeve, që do të shqyrtojë kriteret ligjore kushtetuese të kandidatit të propozuar nga PS-ja.
Në orën 18:00 Kuvendi do të zhvillojë seancën për të ezauruar raundin e katërt. Këtë herë Kuvendi e ka një emër të depozituar, atë të Bajram Begajt. PS i ka votat për të zgjedhur Kreun e ri të Shtetit, pasi në këtë raund mjaftojnë 71 vota.
