Po zhvillohet në Gjykatën e Krimeve të Rënda, seanca e radhës e Fredi Alizotit, personi i cili pretendon se ka imituar zërin e Agron Xhafajt në videopërgjimet e famshme me “Babalen”.
Paraprakisht, mësohet se Alizoti ka deklaruar se ish-deputeti i PD-së, Ervin Salianji, i ka premtuar atij 200 mijë euro për të imituar zërin e Xhafajt.
“Shuma ishte 200 mijë euro për regjistrimin që do të bëhej. Unë kam bërë aty zërin e Agronit, lekët do të mi jepte Ervin Salianji. Mua nuk mu dha shuma dhe prandaj kam bërë kallëzim penal. Regjistrimin e dërguam tek zyrat e PD te Ervin Salianji, do e përdorte për qëllime politike për të goditur Xhafajn”, është shprehur Alizoti.
Ndërkohë, kur u pyet nëse ka biseduar personalisht me Salianjin për paratë, ai u përgjigj se:
“Po por unë nuk i mora. Në atë kohë kam ndenjur te Sali Lusha për lekët. Na thonin jo sot jo nesër. E kanë veshur me mjekër e paruke Albert Veliun. Për ta dërguar në Kosovë, më ka thënë kamerieri të PD-ja. Unë do merrja 100 mijë euro. Se paratë do ndaheshin. Mu dukën shumë dhe thash hajd se po e bëj. Albert Veliu ka numrat e gjysmave të biznesmenëve në Tiranë”, ka thënë ai.
I pyetur se kur u ndanë për ta bërë regjistrimin, Alizoti u shpreh se vetëm një person tjetër e dinte për imitimin që ai do i bënte zërit të Agron Xhafajt.
“Në janar dhe do merrja 100 mijë unë dhe Albert Veliu. Përveç vlerës monetare Albert Veliu kishte edhe përfitimin për azil politik. Mendoj se ai i ka marrë shumën e parave që u ra dakord. Me mbajti ne ajër. Mori vetë azil dhe iku e mua më la në ajër. Albert Veliu nuk ka qenë korrekt me mua.
Gabimi im më i madh dhe faji im është që nuk e regjistrova dhe ta shihnit që çfarë më ka thënë. Se do imitoja zërin e Agron Xhafës e ka ditur vetëm një shoku im nga Elbasani. Nuk ia kam idenë fare për çfarë ka thënë Rama, jam me tetë klasë shkollë. Te PD jam takuar me Ervin Salianjin dhe Gazment Bardhin. Kanë qenë edhe disa persona të tjerë”, ka deklaruar Alizoti.
