Avokatët e Lefter Kokës kanë dorëzuar sot kërkesën për zbutjen e masës së sigurisë, nga “arrest me burg” në “arrest shtëpie”, për inceneratorin e Elbasanit. Masa për ish-ministrin do të merret më 7 nëntor. Gjyqtarja e GJKKO Irena Gjoka, ka lënë në fuqi masën “arrest me burg” për ish-ministrin Lefter Koka.
Një masë më e butë sigurie Kokës iu refuzua edhe nga Gjykata e Lartë në 6 tetor, në të njëjtën ditë kur GJKKO liroi në “arrest shtëpie” ish-sekretarin e përgjithshëm të Ministrisë së Mjedisit, Alqi Bllako.
Ndaj Lefter Kokës janë në fuqi dy masa sigurie; “arrest me burg”, si për inceneratorin e Fierit ashtu dhe atë të Elbasanit.
Avokati i Lefter Kokës, Julian Mërtiti, tha në një deklaratë për mediat se ka pasur kohë mjaftueshëm për të hetuar Lefter Kokën. Tashmë që kanë kaluar 10 muaj, ai e konsideron të padrejtë mbajtjen e tij në paraburgim, pasi është në gjendje të rënduar shëndetësore.
“E përsëris në gjendje të rëndë shëndetësore, gjendje e cila është konstatuar në mënyrë ulëritëse nga të paktën 5 mjekë që janë përzgjedhur nga Prokuroria, jo nga ne!!! Miqtë e mi, asnjë ligj brenda shoqërisë demokratike nuk paraburgos njerëz të sëmurë dhe që nuk pengojnë drejtësinë.
Nëse një vend ku gjykata nuk indoktrinohet nga politika, gjyqtari nuk mund te bej rolin e mjekut. Lefter Koka nuk e pengoi për asnjë çast drejtësinë, tashmë në gjendje të rëndë shëndetësorë nuk ka asnjë shans as ta pengojë e as ti ikë asaj.
Lefter koka mbahet në paraburgim padrejtësisht, dhe në diskriminim të plotë per vepra te cilat kane ndodhur para 8 vitesh dhe te gjitha dosjet administrohen sot nga Prokuroria. Të paraburgosur të tjerë në kushte shumë më të lehta se Lefteri janë lënë të lirë të hetohen”, tha avokati Julian Mertiri.
“Në gjyq do mësoni gjëra që si keni dëgjuar”. Ky është paralajmërimi i fortë i avokatit të Lefter Kokës.
“Do shkojmë në gjyq të hapur, ku ju jeni të ftuar prej nesh të vini e të shihni e dëgjoni vetë se çka ndodhur? Kush bëri çfarë?!
Hajdeni në gjyq, mos përhapni më thashetheme me whatsapp. Hajdeni se mbase do mësoni gjëra që si keni dëgjuar më parë. Lefter Koka është i sëmurë, por është gjallë. Ju faleminderit për vëmendjen. Hajdeni në gjyq”, tha avokati Mërtiri.
