Avokati i familjes Kacifas në Bularat të Gjirokastrës, në një prononcim për mediat greke është shprehur se viktima është qëlluar nga afër dhe se prokuroria e Krimeve të Rënda ka shkelur ligjin në momentin që ka vendosur për marrjen e trupit të 35-vjecarit Kostandinos Kacifas me qëllim ekspertizën e plotë mjeko-ligjore në Tiranë.
Avokati i familjes pohoi se ka parë bashkë me mjekun ligjor për 5 minuta trupin e viktimës dhe ka konstatuar se 35-vjecari është vrarë nga një distancë e afërt prej 15 metrash. Avokati ka treguar se Kacifa ka dy plumba, një në kraharor dhe një në zemër dhe se trupi ishte qepur.
Ndërkohë edhe Kunati i Kacifas e ka cilësuar si vrasje qitjen nga një distancë e afërt sipas tij të RENEA-s.
“Ndërsa ne po bëheshim gati të merrnim trupin në shtëpi, prokuroria me një urdhër nuk na lejon dhe e largon në Tiranë. Kemi kërkuar të jemi të pranishëm gjatë ekspertizës, por jo vetëm kjo nuk na u pranua, por as nuk kemi një procesverbal të kësaj ekspertize. Ne jemi për dashurinë, paqen dhe harmoni mes dy popujve, por me ngjarjet e fundit kjo duket e pamundur“- ka thënë kunati i viktimës në një prononcim për mediat greke.
