Kuvendi i Kosovës po mban seancën për votimin e qeverisë së re, me kryeministër Avdullah Hotin, nga radhët e LDK-së.
Kryeministri i ardhshëm i Kosovës, Avdullah Hoti, ka prezantuar plan programin qeverisës. Në foltore të Kuvendit ka falenderuar stafin shëndetësor për punën e madhe që po bëjnë gjatë pandemisë, dhe u ka shprehur ngushëllime familjarëve që kanë humbur jetën nga COVID-19.
“Gjatë këtyre tre muajve, kemi ndarë fatin e gjithë botës në përballje me pandeminë. Po e filloj fjalën me një falënderim për stafin mjekësor dhe policët. U shpreh ngushëllime viktimave të kësaj pandemie e të prekurve të shërohen sa më parë. Këto kohë të vështira po testojnë moralin tonë për t’u përballur me këtë pandemi të përmasave globale”.
Hoti falënderoi edhe ata që me votën e tyre do të mund ta bëjnë kryeministër. “Falënderoj partitë e koalicionit për besimin. Ky besim ishte një akt i guximshëm i vendosjes së lartë politike dhe ndjej përgjegjësi ndaj këtyre deputetëve, e në veçanti ndaj qytetarëve e Kushtetutës. Kosova ende po përballet me armikun e padukshëm dhe në veçanti ata që janë më të brishtë nga shëndeti. Ky virus ka prekur ekonominë tonë dhe po dobëson fuqitë tonë për përballje. Jemi vënë në provë edhe për vlerat tona si solidariteti dhe sakrifica”.
“Pavarësisht se jemi shtet i ri, si shoqëri kemi treguar forcë për të vepruar me përgjegjësi për të ndjekur postualatin e Nënë Terezës se mund të bëjmë gjëra të vogla më dashuri të mëdha. Ne që kemi mbi supe peshën e votës qytetare, jemi të obliguar për të qëndruar krah njëri-tjetrit, por për t’i dhënë demokracisë tonë një çlirim të ri”.
Hoti duke kritikuar populizmin e Qeverisë Kurti, ku ishte zëvendës i postit që po synon, tha se qeveria e re nuk do të ketë asnjë fuqi tjetër përveç asaj që buron nga Kushtetuta.
“Kur kemi pranuar këtë sfidë jo të lehtë, por pa alternativë, jemi nisur për të respektuar demokracinë. Demokracia jonë duhet të avancojë në drejtim të demokracisë perëndimore dhe në asnjë drejtim tjetër. Jemi nisur nga bindja jonë se nevojitet gjithëpërfshirje, jo stigmatizim e përjashtim. Nuk do të ketë qeveri me sfond populist si e kaluara”.
Hoti ka premtuar sot se me të në krye të qeverisë, nuk do të ketë shkëmbim territoresh. Ai tha se prioritet është dialogu i udhëhequr nga BE dhe SHBA, por territoret nuk preken.
“Prioritet do të jetë edhe marrja e përgjegjësive, për të çuar procesin e dialogut në bashkëpunim me BE e SHBA, duke mos lejuar ndryshim territori e shkëmbim territori”, tha Hoti.
