Detaje të reja janë hedhur në dritë, sa i takon mjetit pa targa të djegur në Vlorë. Policia njoftonte më herët se rreth orës 01:15, në vendin e quajtur “Kanali i Motorrit”, është konstatuar duke u djegur një automjet tip “fuoristradë”, pa targa, i cili është djegur plotësisht.
Dyshohet se mjeti mund të jetë përdorur për ndonjë ngjarje kriminale, që ka ndodhur më parë. Në 24 orët e fundit policia nuk ka raportuar për ndonjë ngjarje të tillë, shkruan “Panorama”.
Zona ku u dogj makina është një pjesë e pyllit të Sodës, që ka akses në tre hyrje-dalje për Vlorë dhe autostradë.
Policia e Vlorës është duke punuar për të parë se nga cila anë ka ardhur automjeti, deri në vendin ku u dogj.
Po ashtu sipas policisë, autorët kanë qenë profesionistë, pasi makina nuk ka shasi dhe për pasojë nuk mund t’i ofrohet ekspertëve asnjë e dhënë shtesë.
