Pas publikimit nga ana e Partisë Demokratike të audio-përgjimit, ka reaguar Agron Xhafaj, vëllai i ministrit të Brendshëm Fatmir Xhafaj.
Ai ka dorëzuar një kallëzim penal në Prokurorinë e Tiranës ndaj 3 zyrtarëve të Partisë Demokratike; Enkelejd Alibeaj, Gazmend Bardhi dhe Ervin Salianji.
Agron Xhafaj, që ka ndryshuar emrin në Geron Xhafaj, i konsideron pa bazë akuzat duke kërkuar ndjekjen penale për 3 përfaqësuesit e Partisë Demokratike për akuzën e “kallëzimit të rremë”. Në padinë e tij ai thotë se nuk ka asnjë lidhje me audio-përgjimin e publikuar.
Agron Xhafaj ka deklaruar se audio-përgjimi është i rremë, i konsumuar nëpërmjet sajesës dhe manipulimit të provave. Kallëzimi penal është dorëzuar në orët e mbrëmjes së ditës së hënë në Prokurorinë e Tiranës.
Në materialin e publikuar nga PD-ja, protagonistë janë Bashkëpunëtori X dhe Agron Xhafaj. X-i është bashkëpunëtor i Agron Xhafajt në të shkuarën dhe pasi ka dalë nga burgu në Itali ka ardhur në Shqipëri dhe i kërkon ndihmë t’i gjejë ngarkesë me kanabis dhe ta punësojë si skafist për të bërë një rrugë Italie, sepse ka mbetur pa para’.
PD akuzoi Agron Xhafajn si bos droge në Shqipëri dhe Ministrin e Brendshëm Fatmir Xhafaj se i ka siguruar paprekshmëri vëllait.
