Flakët e zjarrit që kanë ‘pushtuar’ Athinën, nuk dinë të ndalen. Shtëpi e makina janë bërë shkrumb e hi. Presidenti Ilir Meta i ka shprehur ngushëllimet homologut të tij grek, për ngjarjen e rëndë në Atika, ku gjithë zona u përfshi nga flakët dhe ka mjaft viktima.
“Me ankth e shqetësim të madh po ndjek përhapjen dhe dëmet që po shkaktojnë zjarret e furishme që kanë rënë përqark Athinës.
Jam shumë i tronditur nga viktimat në njerëz dhe i shpreh ngushëllimet më të ndjera familjarëve e të dashurve të tyre. Të lënduarve i uroj shërim sa më të shpejtë.
Lutem që të mos ketë viktima të tjera në njerëz dhe që zjarret e egra të vihen shpejt nën kontroll nga autoritetet zjarrfikëse greke.
Ju siguroj se, në këto momente të vështira, unë dhe populli shqiptar jemi krah jush dhe qytetarëve të Athinës e të gjithë Greqisë”, thuhet në mesazhin e Metës.
https://tiranatoday.com/digjet-athina-50-te-vdekur-e-150-te-lenduar-ambasada-jone-fatmiresisht-ska-shqiptare/
Mbi 50 persona kanë humbur jetën nga zjarri i nisur një ditë më parë në Athinë, rreth 150 kanë mbetur të lënduar e disa të tjerë janë zhdukur.
Vetëm në një vend pranë një restoranti në Mati të Atikës janë gjetur 26 trupa njerëzish të djegur, midis tyre edhe fëmijë, ndërsa 150 persona ndodhen në spital, 15 prej të cilëve në gjendje të rëndë për jetën.
Mediat e huaja bëjnë me dije se shumë prej të vdekurve kanë ngecur në makina, e ndërsa policia dyshon se mund të ketë edhe të mbytur në det.
Aktualisht janë rreth 1 mijë shtëpi të djegura. Mes të vdekurve edhe shumë fëmijë. Autoritetet policore kanë gjetur nënat me fëmijët e vdekur në krahë.
