Të tjera detaje kanë dalë lidhur me ngjarjen që tronditi mbrëmjen e djeshme qytetin e Fierit.
Sherri fillimisht nisi mes familjeve Zhapa dhe Braçe në Levan, ndërsa përfundoi në përdorimin e armëve në Urgjencën e spitalit, duke lënë të plagosur pesë persona.
Mësohet se të lënduar kanë mbetur shtetasit Aleksandër Zhapa, Aldi Zhapa dhe Gentjan Zhapaj, të cilët ndodhen të shtruar në pavionin e spitalit.
Ndërsa, dy të plagosurit e tjerë, Klajdi Jonuz Lamaj dhe Erlind Afrim Muçaj ndodhen në reanimacion.
Sipas policisë, dy vëllezërit Gentian dhe Aldi Zhapaj janë dëmtuar me sende të forta, ndërsa shtetasit Klajdi Lajma dhe Afrim Muçaj janë lënduar me mjet prerës, gjatës herrit mes dy familjeve në Levan.
Sipas njoftimit të policisë, në Urgjencën e spitalit një prej shoqërueseve të të dëmtuarve i ka marrë armën e zjarrit nga brezi punonjësit të policisë, i cili po ndihmonte për të futur të plagosurit në Urgjencë dhe ka plagosur me të një prej familjarëve të palës tjetër, shtetasin Aleksandër Zhapajn, babain e Gentian dhe Aldo Zhapa.
Forca të shumta policore kanë ruajtur ambientet e spitalit gjatë gjithë natës.
