Pasditen e sotme është plagosur me armë zjarri Saimir Taullau, 47 vjeç. Policia konfirmon se ai është plagosur tek rrethrrotullimi i Plugut në Lushnje.
Saimir Taullau është qëlluar me armë para lokalit të tij. Ai është transportuar në Spitalin e Lushnjës ku ndodhet jashtë rrezikut për jetën.
I plagosuri i mbrëmjes së sotme Saimiri është vëllai i Baki Taullaut, i cili është vrarë në vitin 2005 në ditën e zgjedhjeve.
Vrasësi i Bakiut ishte anëtari i bandës së Aldo Bares, Leonard Prifti, i cili eliminohet më pas prej djemve të viktimës.
Por ngjarjet pasojnë njëra-tjetrën. Duhet të sqarojmë se i plagosuri Saimir Taullau ka qenë në burg me Laert Haxhiun që dyshohet se kreu atentatin në Lushnje para një viti. Policia ka dyshime të forta për përfshirjen e mundshme Saimir Taullaut.
Për ngjarjen e vitit 2016 ku mbetën të plagosur Shkurti dhe Xheliu nuk u arrestua asnjë person ndërsa i dyshuari kryesor nga policia ishte Laert Haxhiu 25 vjeç.
Ndërkohë në tetorin e vitit të kaluar u vra Jurgen Hoxha dhe Zamir Latifi të cilët u qëlluan me breshri kallashnikovi teksa ishin duke pirë kafe në një lokal pranë “Urës së Përroit”.
Por objektivi kryesor i sulmit ishte Xhulio Shkurti, nipi i Aldo Bares, i cili vetëm 10 minuta para ngjarjes ishte larguar nga lokali ku po pinte kafe me miqtë e tij.
Atentati ndaj Saimir Taullau vjen 13 vite pas vrasjes së të vëllait, dhe dyshohet se shkak janë konfliktet e vjetra dhe prishjet e pazareve të drogës. Baki Taullau u vra nga banda e Aldo Bares.
Këtë e dëshmon vetë Saimir Taullau para trupit gjykues të Gjykatës së Krimeve të Rënda teksa rrëfen për vrasësin e vëllait të tij.
Taullau: Vëllanë ma vranë për 500 mije euro
“Është gjynah te them qe nuk i njoh këta persona. I njoh edhe për fytyra për shkak te presioneve qe shpesh i bënin me telefon vëllait tim, Bakiut. I kërkonin para. Por, presionet për t’i marre para nuk ia bene vetëm një here, por shume here. Presionet i bëheshin për mua.
Nuk di se çfarë kishin me mua, pasi unë nuk jam përplasur asnjëherë me ta. Në kohën kur filluan presionet për gjobat, unë isha në Itali. Sapo kisha dalë nga burgu, kur u hapen burgjet gjate trazirave, ku gjendesha prej vitit 1993. Ika ne Greqi dhe me pas ne Itali.
Unë dhe vëllezërit e mi, punonim bashke ne bizneset tona. Enver Dondollaku, Ilir Stergu e Leonard Prifti, e merrnin shpesh ne telefon vëllane dhe i bënin presion se do me vrisnin mua. Qe te mos e bënin këtë, ata i kërkonin një shume eurosh.
Nga sa me kane treguar mua, një here i ka çuar vëllai tjetër, Berti 10 mije euro, me pas ka pasur gjoba te tjera të vëna, disa edhe të paguara.
Por, Bakiu kishte një veti qe nuk fliste shumë. Të vetmit qe mund t’i ketë treguar disa gjera ishte Berti, vëllai tjetër, i cili rrinte edhe te karburanti i tij. Mbaj mend qe gjoba e fundit ka qene 500 mije euro, e cila nuk u pagua dhe solli vrasjen e vëllait”, deklaroi para 13 vitesh Saimir Taullau. TIRANA TODAY
