Policia e shtetit ka kryer kontrolle të koordinuara në disa banesa në Durrës, Tiranë dhe Fushë Krujë në kërkim të atentatorëve të prokurorit Arjan Ndoja.
Sipas informacionit në banesat e të dyshuarve janë gjetur armë dhe municione. Megjithatë, deri tani asnjë emër nuk është bërë i ditur publikisht. Mësohet se janë 20 persona të shoqëruar në polici për ngjarjen.
Prokuroria e Krimeve të Rënda, e cila po heton mbi motivet dhe autorët e atentatit ka ngritur pistat e para. Ka dyshime se atentati të ketë qenë i porositur. Pistat kryesore janë për ngjarje kriminale dhe ato që lidhen me dosjet e pronave.
Prokurorët thanë se kanë marrë në cilësinë e provës materiale të gjitha dosjet e fundit që prokurori Ndoja ka marrë në shqyrtim. Dëshmia e tij është siguruar pak minuta pas ngjarjes, por prokurorët thanë se do ta ri-pyesin. Prokurorët thanë se janë në pritje të përmirësimit të gjendjes shëndetësore të Andi Malokut, shoferit të prokurorit dhe Landi Muharremit, mikut të tij, për të marrë dëshmi në imtësi dhe të dhëna që do të shërbejnë për hetimin.
