Ditën e djeshme u arrestua një nga 3 personat, i cili dyshohet që ndodhej në automjetin që qëlloi në drejtim të automjetit të prokurorit Arian Ndoja.
34-vjeçari, Redjan Rraja, kushëriri i deputetit të PS-së, Rrahman Rraja, rezulton të jetë i përfshirë në disa ngjarje të rënda kriminale. Nën drejtimin e Prokurorisë për Krime të Rënda, Policia ushtroi kontrolle të shumta në disa banesa për zbardhjen e atentatit.
Me vendim të Gjykatës, kontrollet u kryen në 3 qytete: Tiranë, Krujë dhe Lushnjë ku mësohet të jenë gjetur prova të rëndësishme për dokumentimin e atentatit.
Policia konfirmoi ditën e djeshme se provat e gjetura janë duke iu nënshtruar analizës nga ana e grupit hetimor. Ndërsa pjesa tjetër e tyre është dërguar për ekzaminim në Laboratorin e Policisë Shkencore.
Deri më tani policia ka identifikuar 3 persona, të cilët dyshohen të kenë marrë pjesë në mënyrë aktive në atentat. Ndërkohë vijojnë hetimet për të gjetur persona të tjerë të përfshirë.
“Për dokumentimin ligjor të këtij procedimi penal, për zbulimin e autorëve të mundshëm të kryerjes së kësaj ngjarjeje të rëndë kriminale, me qëllim zbulimin dhe sekuestrimin e provave materiale që lidhen me autorët e atentatit me tri të plagosur, iu kërkua Gjykatës së Shkallës së Parë për Krime të Rënda lejimi i kontrollit të banesave të 11 shtetasve me banim në Krujë dhe të katër shtetasve me banim në Tiranë dhe në Lushnjë. Si rezultat i këtyre kontrolleve, u gjetën dhe u sekuestruan prova materiale, që dyshohet se kanë lidhje me autorët e mundshëm të kësaj ngjarjeje. Provat e sekuestruara po i nënshtrohen një analize të hollësishme nga grupi hetimor dhe një pjesë e tyre u dërguan në Laboratorin Shkencor për ekzaminim të mëtejshëm”, njoftoi ditën e djeshme Policia.
