Dy persona humbën jetën në atentatin e ndodhur mëngjesin e sotëm, në mbikalimin e Panajasë në Vlorë, në një atentat me armë zjarri. Makina tip “Benz” e viktimave është qëlluar me armë nga një automjet tip “BMW” pa targa që ecte paralel me ta.
“Nga verifikimet paraprake dyshohet se kanë mbetur të vrarë shtetasit G (Sh). L., 37 vjeç dhe H. K., 34 vjeç”, konfirmoi policia zyrtarisht.
Ndërkohë policia ka sqaruar se “mjeti i gjendur i braktisur dhe i djegur, pas verifikimit rezulton të jetë me targa të huaja italiane, ndërsa nga atentati të vrarë me armë zjarri kanë mbetur dy shtetas.
Shpati Lena dhe Hakim Xhezo janë ekzekutuar nga një atentat i mirëorganizuar në aksin Fier-Vlorë, në afërsi të mbikalimit të fshatit Panaja.
Viktima Shpati Lena, emër i njohur për policinë
Shpati Lena ka qenë arrestuar më parë si i përfshirë në vrasjen ku mbeti i vrarë pronari i lokalit në plazhin e Vlorës, Arben Beqiraj. Ngjarje e ndodhur në gusht 2019. Grupi i Shpati Lenës, vrau Arben Beqirajn pas një sherri për kalin e Eduart Xhezos që hyri në plazh.
Sakaq një makinë tip “BMW” me targa të huaja, e vjedhur në Durrës disa javë më parë, është gjetur e djegur në fshatin Çerven, në aksin rrugor Levan-Tepelenë dhe dyshohet se i përket autorëve. Brenda makinës së djegur plotësisht janë gjetur tre automatikë.
Shpati Lena u prangos në muajin mars, por u lirua më pas nga gjykata
Shpati Lena, i vrarë sot, u arrestua 23 marsin e kaluar nga policia dhe më pas u lirua nga gjykata. Ai u prangos me dy të tjerë, ndërsa ishin duke lëvizur me automjet në zonën e Ujit të Ftohtë të dyshuar për ngjarjen e ndodhur në 4 gusht 2019 në Plazhin e Vjetër, ku mbeti i vrarë Arben Beqiraj dhe u plagos djali i tij dhe një i afërm i tyre. Gjatë operacionit për arrestimin e tyre iu sekuestruan edhe dy armë zjarri pistoletë dhe municion luftarak.
