Çifti që u ekzekutua me armë zjarri në një atentat mafioz sot në Shkodër, Boran Berçama dhe Silvi Ndoci, jetonin prej 7 muajsh në katin e tretë të një pallati në lagjen “Naim Gjylbegu”, së bashku me djalin e tyre 1 vjeç e gjysmë.
Boran Berçama mësohet se ka marrë një plumb në kokë, ndërsa plumbat e tjerë në trup, ndërsa bashkëjetuesja e tij është qëlluar vetëm në trup. Po kështu burimet konfirmuan se në vendngjarje janë gjetur 20 gëzhoja plumbash.
Skena e krimit
Grupi i ekspertizës i cili ka ndërtuar skenën e krimit, thotë se ish-efektivi në momentin që ka parë personin/at të qëllojnë në drejtim të tyre, ka tentuar të mbrojë bashkëjetuesen dhe fëmijën e tij, duke i mbuluar me trup.
Berçama ishte tërhequr nga policia, emigroi në Francë
Që në nisje të Vettingut, Berçama nuk ishte më pjesë e Policisë së Shtetit, pasi ishte tërhequr nga detyra që mbante si efektiv. Ai ka shërbyer për një periudhë kohë në rrethin e Pukës, në Bashkinë e Fushë-Arrëzit. Për një periudhë kohe të shkurtër, kishte emigruar në Francë dhe më pas ishte rikthyer në Shkodër, ku prej 7 muajsh jetonte në katin e tretë të një pallati në lagjen “Naim Gjylbegu” me bashkëshorten e tij, edhe pse zyrtarisht nuk kishin bërë celebrimin, dhe djalin.
Policia sekuestron kamerat e sigurisë së subjekteve përreth
Për kapjen e autorëve, policia po kështu ka siguruar pamjet filmike të disa subjekteve përreth. Uniformat blu kanë shoqëruar në komisariat për marrjen në pyetje dëshmitarët në vendngjarje dhe familjarët e viktimave.
