Mesnatën e kaluar, në një atentat në Berat mbeti i plagosur një 24-vjeçar. Tajar Fetiu është qëlluar me gjashtë plumba, teksa ka qenë duke hyrë në rrugicën e shtëpisë së tij.
Ngjarja është regjistruar në lagjen “Dëshmorët e Kombit” në Berat. 24-vjeçari Fetiu ka qenë duke hyrë në këmbë në rrugicën e shtëpisë së tij, kur një person e ka ndjekur dhe e ka qëlluar gjashtë herë me pistoletë.
Dy plumbat e pistoletës e kanë prekur të riun në bark, duke e rrëzuar në tokë. Mësohet se autori, pasi e ka goditur disa herë me armë Fetiun, është larguar në rrugicat e lagjes. I plagosuri Tajar Fetiu është transportuar drejt Spitalit Rajonal Berat, por për shkak të gjendjes së tij të rëndë, ai është transportuar drejt Spitalit të Traumës në Tiranë.
Policia gjen gjashtë gëzhoja pistotele, identifikohet autori
Pas plagosjes, në vendngjarje kanë shkuar forca të shumta policore, që kanë kryer për disa orë kqyrjen e vendit të ngjarjes, ku kanë gjetur edhe gjashtë gëzhoja pistotele. Burimet zyrtare të policisë konfirmojnë se janë sekuestruar edhe kamerat e disa bizneseve përreth, dhe se është identifikuar autori i dyshuar. Për arsye hetimi, nuk bëhet me dije identiteti i tij.
I plagosuri jetonte në Londër
Burime nga vendngjarja bëjnë me dije se vetë i plagosuri Tajar Fetiu jetonte prej vitesh në Londër, dhe kthehej çdo vit në verë për pushime. Të njëjtat burime pohojnë se i plagosuri nuk është njohur si djalë problematik, ndërkohë që nga policia konfirmohet se nuk ka precedentë të mëparshëm penal.
