Një tjetër atentat ka tronditur vendin. 58-vjeçari Sokol Çelaj është ekzekutuar me armë zjarri në Malësi të Madhe. Atentati i është bërë teksa ka qenë duke lëvizur me makinën e tij, bashkë me bashkëshorten. Sokol Çelaj është vrarë mbrëmjen e djeshme, rreth orës 22:50 në fshatin Reç, Malësi e Madhe.
Çelaj ka qenë në një mjet tip Benz ML së bashku me bashkëshorten e tij, në momentin që një person ka qëlluar shumë herë në drejtim të tyre.
Në dëshminë e saj në polici, bashkëshortja ka deklaruar se një person i ka dalë para me kallashnikov dhe ka qëlluar në drejtim të tyre. Bashkëshortja nuk ka arritur të identifikojë se kush ka qenë autori, për shkak të errësirës.
“Sapo kemi dal nga rruga e asfaltuar për të shkuar tek shtëpia, nga e djathta e jonë një person në këmbë ka dal nga pylli dhe ka filluar të qëllojë”.
Autori i ka dalë para makinës, dhe ka qëlluar 5-6 herë me zjarri kallashnikov në drejtim të mjetit. Sokol Çela, nga Reçi i Malësisë së Madhe, po udhëtonte me mjetin e tij në drejtim të banesës rreth 50 m larg vendit ku ka ndodhur ngjarja.
Viktima për disa vite ka qenë emigrant në Angli, ndërkohë që prej 3 vitesh ështe kthyer në vendlindje dhe ka punuar në disa prej restoranteve në zonën e Malësisë së Madhe.
Shërbimet e Policisë kanë ngritur pika kontrolli, por nuk ka asnjë të arrestuar për ngjarjen në fjalë.
Rezulton se viktima ka kryer një vrasje para viteve ’90, ngjarje që asokohe u cilësua si e ndodhur nga pakujdesia. Nuk dihet ende nëse ekzekutimi i Çelajt ka lidhje me këtë ngjarje.
Njoftimi i policisë
Më datë 26.08.2021, rreth orës 22:50, në fshatin Reç, Malësi e Madhe, në rrethana ende të paqarta është qëlluar me armë zjarri shtetasi S. Ç. i cili ka qenë duke lëvizur me automjetin e tij. Shtetasi S.Ç, pasi është transportuar në spitalin e Shkodrës ka ndërruar jetë si pasojë e plagëve të marra. Shërbimet e Policisë kanë ngritur pika kontrolli dhe vijon krehja e zonës për identifikimin dhe kapjen e autorëve. Grupi hetimor nën drejtimin e Prokurorisë po vijon punën për sqarimin e rrethanave të kësaj ngjarje.
