Ish-kryeministri japonez Shinzo Abe u qëllua me armë zjarri në një ngjarje në qytetin Nara. Abe u qëllua dy herë teksa po mbante një fjalim, e ndërsa autori është arrestuar. Ish-guvernatori i Tokios, Yoichi Masuzoe, tha në një postim në Twitter se 67-vjeçari Abe ishte në një gjendje arresti kardiopulmonar. Termi përdoret shpesh përpara se një vdekje të konfirmohet zyrtarisht në Japoni.
Agjencia e Menaxhimit të Zjarrit dhe Fatkeqësive konfirmoi se Abe kishte një plagë plumbi në të djathtë të qafës dhe gjithashtu pësoi gjakderdhje nën pjesën e majtë të gjoksit. “Ish-kryeministri Abe u qëllua rreth orës 11:30 me orën lokale (02:30 GMT) në Nara. Një burrë, që besohet të jetë ai që ka qëlluar, është arrestuar. Gjendja e ish-kryeministrit Abe aktualisht nuk dihet”, u tha gazetarëve shefi i kabinetit, Hirokazu Matsuno.
“Cilado qoftë arsyeja, një akt i tillë barbar nuk mund të tolerohet kurrë dhe ne e dënojmë ashpër atë”.
Dëshmitarët okularë panë një burrë me armë të madhe
Z. Abe po mbante një fjalim për një kandidat në Nara kur ndodhi sulmi – dëshmitarët okularë thanë se panë një burrë që mbante atë që ata e përshkruan si një armë të madhe dhe qëllonte nga pas.
Ai ra menjëherë në tokë i gjakosur. Oficerët e sigurisë arrestuan autorin, i cili nuk bëri asnjë përpjekje për të vrapuar. Transmetuesi lokal i lajmeve NHK tha se policia ka sekuestruar armën e sulmuesit dhe e ka identifikuar atë.
NHK shtoi se i dyshuari – i cili është identifikuar si Tetsuya Yamagami – përdori një armë të punuar me dorë. Ai besohet se është rreth të 40-tave dhe është banues në Nara. Raportet e mediave lokale thonë se ai besohet të jetë një ish-anëtar i Forcës Vetëmbrojtëse Detare të Japonisë, ekuivalenti lokal i një marine.
Pyetja e parë që do të bëjnë shumë njerëz është se çfarë ishte arma e përdorur dhe si e kapi atë që gjuajti?
Përgjigja duket të jetë se ai mund ta ketë ndërtuar vetë. Fotografitë e marra ndërsa i dyshuari po kapej, tregojnë atë që duket si një armë gjahu me dy tyta e improvizuar ose e bërë në shtëpi. Dhuna me armë është shumë e rrallë në Japoni, dhe armët janë jashtëzakonisht të vështira për t’u zotëruar.
Zoti Abe kishte me vete një ekip policie sigurie. Por duket se gjuajtësi ishte ende në gjendje të arrinte pak metra larg zotit Abe pa asnjë lloj kontrolli apo pengesë. Vrasja e një figure kaq të shquar është thellësisht tronditëse në një vend që krenohet se është kaq i sigurt.
Abe, kryeministri më jetëgjatë i Japonisë
Abe, i cili ishte kryeministri më jetëgjatë i Japonisë, mbajti detyrën në vitin 2006 për një vit dhe më pas përsëri nga 2012 në 2020, përpara se të largohej për arsye shëndetësore. Më vonë ai zbuloi se kishte pësuar një rikthim të kolitit ulceroz, një sëmundje e zorrëve.
Gjatë kohës që ishte në detyrë, ai ishte i njohur për politikat e tij agresive në fushën e mbrojtjes dhe politikës së jashtme, dhe prej kohësh ka kërkuar të ndryshojë kushtetutën pacifiste të pasluftës të Japonisë.
Ai gjithashtu shtyu për një politikë ekonomike që u bë e njohur si “Abenomics” – e ndërtuar mbi lehtësimin monetar, stimulin fiskal dhe reformat strukturore. Incidentet e dhunës me armë janë të rralla në Japoni, ku armët e dorës janë të ndaluara – dhe incidentet e dhunës politike janë pothuajse të padëgjuara.
Në vitin 2014, kishte vetëm gjashtë incidente të vdekjeve me armë në Japoni, krahasuar me 33,599 në SHBA. Njerëzit duhet t’i nënshtrohen një provimi të rreptë dhe testeve të shëndetit mendor për të blerë një armë – dhe madje edhe atëherë, lejohen vetëm armë gjahu dhe pushkë ajrore.
Zëra të shquar në mbarë botën kanë qenë të shpejtë për të dënuar incidentin, me ish-kryeministrin australian Kevin Rudd që e quajti atë një “sulm ndaj mbështetësve të demokracisë”.
Ambasadori i SHBA në Japoni Rahm Emanuel tha se zoti Abe kishte qenë një “udhëheqës i shquar i Japonisë dhe aleat i palëkundur i SHBA”, duke shtuar se SHBA “po luteshin” për mirëqenien e tij.
Burimi i lajmit: BBC. Përshtatur nga Tirana Today
