Deputeti i PD-së, Astrit Patozi tha në media se deri më 22 korrik, ditë kur do të zhvillohet zgjedhjet brenda PD për kreun e ri të partisë, mund të ndryshojnë shumë gjëra. Ai uron që gjatë kësaj jave që të ndodhë diçka që të mund të shpëtojë PD-në nga zgjedhjet, që ai i cilëson farsë. Patozi shpreson në ndërprerjen e fushatës për kreun e PD dhe fillimin e një gare tjetër me rregulla të barabarta loje Patozi prej disa ditësh vijon takimet me demokratët e zhgënjyer pas zgjedhjeve të 25 qershorit.
“E vetmja gjë që mund ta shpëtojë PD-në, është që gjatë kësaj jave, nuk është kohë e gjatë, por e mjaftueshme që diçka të ndodhë, që kjo garë të ndërpritet. E vetmja gjë mund ta shpëtojë PD-në është ndërprerja e kësaj gare dhe rifillimi i saj me rregulla loje. Kjo mund të ndodhë nëse Basha do të reflektojë. Kjo mund të ndodhë nëse demokratët do t’ia bëjnë të pamundura atij takimet e ardhshme elektorale. Apo mund të themi që të ketë një instrument, i cili me shumë mundësi nuk do të përfillet, i cili do ta detyrojë Bashën që të marrë një vendim tjetër. Unë nuk mund t’i parashikoj të gjitha çfarë mund të ndodhë”, tha Patozi.
