E hëna nuk ishte një ditë e zakonshme për klubin e Skënderbeut, pasi futbollistët refuzuan të stërviten për shkak të rrogave të prapambetura. Ndërsa ditën e sotme është mbajtur një mbledhje urgjente, ku para lojtarëve ka folur trajneri Orges Shehi edhe pse i pranishëm ka qenë edhe presidenti Takaj. Futbollistëve u është bërë e qartë që do të ketë garanci financiare në vazhdimësi.
“Askujt prej lojtarëve të Skënderbeut nuk do t’i mbahet asnjë lek. Financat nuk kanë qenë kurrë problem për këtë klub”, mësohet të jetë shprehur Shehi para skuadrës. Pritet që pas pak klubi të dalë zyrtarisht në një komunikatë në faqen e “Facebook”-ut në lidhje me këtë ngjarje. Lojtarët pas mbledhjes 30 minuta me Shehin kanë dalë në stërvitje si zakonisht, duke u bindur nga fjalët e trajnerit.
Kujtojmë që Sabjen Lilaj nuk është ndarë mirë nga Skënderbeu, pasi klubi i kishte disa rroga borxh dhe tashmë futbollisti ka apeluar për ti marrë. Fillimisht drejtuesit e mohuan këtë fakt dhe më pas kërkuar që të gjejnë një rrugë të përbashkët për ta zgjidhur.
