Prokuroria ka nisur hetimet pas asfiksimit të nxënësve një ditë më parë, pas një prove që bënë punonjësit e bashkisë. Nga ngjarja në fjalë u dëmtuan më shumë se 70 nxënës të gjimnazit të Shupenzës, Dibër, të cilët morën dhe ndihmën mjekësore.
Tashmë të gjithë kanë lënë spitalin dhe ndodhen në shtëpi. Ndërkohë shkak i asfiksimit u bë tymi që shkaktoi bllokimi i oxhakut të shkollës. Prokuroria që nga dje ka nisur një hetim për të zbardhur të plotë të gjithë ngjarjen, e cila mund të shkaktonte dhe një tragjedi.
Gjithashtu bëhet e ditur se janë sekuestruar dokumentet për të kryer disa verifikime. Nga dëshmitë e marra deri tani nga punonjës të shkollës, kaldaja ditën e premte kur është ndezur ka funksionuar normalisht. Por më pas ka rezultuar se oxhakët kanë qenë të bllokuar dukë sjellë si pasojë përhapjen e tymit dhe dyoksidit të karbonit nëpër klasa.
Ngjarja e ndodhur një ditë më parë:
Rreth orës 10.40, specialistët e postës së policisë Shupenzë, kanë marrë informacion se disa nxënës shkolle kanë shkuar për të marrë ndihmë mjekësore në qendrën spitalore në Shupenzë.
Menjëherë kanë shkuar në ambientet e qendrës spitalore ku nga veprimet paraprake të kryera ka rezultuar se :
Në një shkollë të mesme në qendër Shupenzë, janë ndezur kaldajat me lëndë drusore për ngrohjen e ambientit, dhe në momentin e ndezjes oxhaku i shkollës ka qenë i bllokuar dhe për pasojë tymi është shpërndarë në ambientet e brendshme të shkollës duke shkaktuar ndotje të ambientit.
Për pasojë janë asfiksuar dhe ndjerë keq nga ana shëndetësore disa nga nxënësit e kësaj shkolle, ku 16 prej tyre të moshave 16-18 vjeç, po transportohen për ndihmë më të specializuar drejt spitalit të Bulqizës, jashtë rrezikut për jetën.
Grupi hetimor vijon hetimet për zbardhjen e kësaj ngjarje.
