Një lajm i trishtë vjen për botën e artit dhe kinematografisë shqiptare, pasi është ndarë nga jeta aktori Muhamet Lika. Parodisti i Vlorës u nda nga jeta sot në Itali në moshën 65-vjeçare. Ai ndodhej në shtetin fqinj për një kontroll periodik shëndetësor, por pas kontrolli, një atak kardiak i ka marrë jetën.
Muhamet Lika, prej disa kohësh vuante nga një sëmundje në zemër, të cilën nuk e ka mundur dot.
Aktori ka bërë për vete shqiptarët jo vetëm me humorin e tij në role të ndryshme, por edhe me këngët që shoqëronte rolet.
Mane Lumani, Afrim Agalliu, Agron Hamo si dhe Muhamet Lika, të katërt në skenë sillnin emocione të mëdha për publikun, dhe si shpërblim merrnin duartrokitjet, respektin dhe mirënjohjen.
Parodistët e Vlorës prej dekadash janë një trupë profesioniste që ka marrë jo pak vlerësime nga publiku. Ata e prekën skenën për herë të parë në vitin 1967.
Katër paraodistët Afrim Agalliu, Agron Hamo, Mane Lumani dhe Muhamet Lika u shfaqën së bashku për herë të fundit vetëm disa ditë më parë në skenën e teatrit “Petro Marko” në Vlorë.
Lika duartrokiti parodistët e rinj të estradës së re në Vlorë, dhe më pas u nis për kontrollin në Itali, por nuk ia doli dot. Ai numëron me qindra role në skenë, dhe i ka falur pafund të qeshura e humor cilësor publikut shqiptar.
