Gazetari Artan Hoxha, ka zbuluar skemën e trafikut ndërkombëtar të drogës që lidhet me rastin e sotëm, ku u ndaluan dy gomone në kufirin grek. Ai ka zbardhur detaje të reja nga megaoperacioni që u zhvillua në ujërat greke, ku në pranga përfunduan dy shqiptarë dhe një italian. Hoxha tha se gomonet po vinin nga Turqia, dhe se brenda tyre nuk kishte drogë.
“Deri tani është thënë që janë dy shqiptarë dhe një italian. Gomonet janë diktuar gjatë rrugës së kthimit nga Shqipëria drejt Greqisë. Skafistët tanë kishin mundësi të përshkonin të gjithë ujërat detare.
Në momentin kur është kapur Met Kanani dhe grupi i tij, nuk u kapën dot mjetet lundruese. Më ka rezultuar që ngarkesa prej dy tonësh ishte transportuar nga Vlora drejt Turqisë. Në këtë rrugë kalojnë gjithmonë ngarkesa të mëdha mbi 1 ton. Në vendin e zbarkimit, grupi pritës lë në bregdet një sasi karburanti me bidona plastikë, merr karburantin rezervë që shërben për rrugën e kthimit. Kjo rrugë bëhet për 48 orë. Është e njëjta linjë që është përdorur edhe sot.
Zbarkimet bëheshin në afërsi të Stambollit, në zonën Izmirit dhe në zonën e Bodrumit. Zgjidhen vende turistike pasi ka shumë lëvizje dhe këto janë zonat që kanë më shumë interes për ta blerë lëndën narkotike.
Skafistët marrin në shkëmbin heroinë. Është linja tradicionale. Sillet në rrugën detare në Shqipëri, dhe më pas trafikohet drejt vendeve të tjera. Kanë vetëm një problem gjatë udhëtimit. Kanë problem në një ngushticë në detin Egje, ku duhet të qëndrojnë gjatë orëve të natës, nga ora 01:00 pas mesnate, pasi aty ka një patrullë ushtarake.
Pjesa tjetër e udhëtimit kryhet normalisht. Ata që janë grumbulluesit e hashashit në Shqipëri, merren vetëm me transportin, dhe jo kultivimin. Ai paguhet vetëm për transportin. Nuk janë pjesë e grupit të grumbullimit. Ky është kanabis i ri.
Gomonet që janë kapur sot janë në rrugën e kthimit, pasi janë kapur pa ngarkesë. Personat që bëjnë këtë rrugë, janë persona që për njëfarë kohe u zhvendosën dhe kanë punuar në zonën e detit Mesdhe. Kanë bërë edhe Barcelonën. Ata ishin të aftë të kalonin edhe distanca të tilla të mëdha”, tha Artan Hoxha.
