Prokurorja e Përgjithshme e përkohshme, Arta Marku duket se ka futur në sherr jo vetëm mazhorancën dhe opozitën, por edhe personalitete të rëndësishme brenda LSI-së.
Konkretisht, është nënkryetari Luan Rama ai që ka kundërshtuar publikisht kryetaren e LSI-së, Monika Kryemadhin, lidhur me kryeprokuroren Arta Marku.
Teksa Kryemadhi është shprehur vazhdimisht se nuk ka asgjë personale me Markun, por me praktikën antikushtetuese dhe antiligjore që u ndoq nga PS-ja, Luan Rama e kundërshton publikisht, teksa shkruan se kryeprokurorja, me ose pa vetëdije, u bë pjesë e lojës politike të PS-së.
Reagimi i Luan Ramës:
Nuk jam dakord me ju zonja Kryemadhi!
Nga Luan Rama
Që prej votimit antikushtetues në Kuvendin e Shqipërisë, kur zonja Arta Marku u caktua si prokurore zëvendësuese e Prokurorit të Përgjithshëm e në vijim, ju kam dëgjuar në të gjitha prononcimet tuaja publike të shpreheni se “nuk jemi kundër Artës e nuk kemi gjë me të, por me praktikën antikushtetuese dhe antiligjore që u ndoq nga ana e Partisë Socialiste”.
Më lejoni zonja Kryemadhi t’ju shpreh objeksionet e mia, përkatësisht edhe kundërshtimin tim ndaj këtij qëndrimi të shprehur nga ana juaj, pasi zonja Arta Marku, me apo pa vetëdije, u bë pjesë e lojës politike të Partisë Socialiste për të deformuar e penguar reformën në drejtësi dhe pranoi të zëvendësojë Prokurorin e Përgjithshëm, e mbështetur vetëm nga votat e urdhëruara të Kryeministrit dhe klanit të tij!
Një prokuror me integritet qytetar dhe profesional, një profesionist që karrierën e bazon në zotësitë profesionale dhe jo në konjukturat politike, një jurist që i falet vetëm ligjit dhe jo urdhërit politik, nuk do të pranonte të caktohej në një detyrë në kundërshtim me Kushtetutën dhe përmes një një procesi krize dhe konflikti politik!
Procesi antikushtetues dhe antiligjor i kapjes politike të Prokurorit të Përgjithshëm nuk është as virtual dhe as imagjinar. Ai ka autorë realë, ka protagonistë, ka aktorë, ka njerëz përgjegjës, dhe Arta Marku është një ndër ta!
