Që prej vitit 2010 Kosova ka bërë përpjekje të njëpasnjëshme për t’u anëtarësuar në INTERPOL (organizatën më të madhe ndërkombëtare për bashkëpunim policor), por pa sukses.
Këtë “rrugëtim” e ka vështirësuar edhe lobimi i Serbisë. Ndonëse me një këmbë të thyer, pas dështimit të vitit 2018-të, Kosova edhe këtë vit i kishte hyrë rrugëtimit për të pestën herë me radhë për t’u bërë pjesë e INTERPOL.
Por edhe kësaj radhe Kosova dështoi ta finalizojë këtë rrugëtim. Kësaj here jo për shkak të mossigurimit të 2/3 të votave, por me kërkesën e autoriteteve kosovare, të cilët një ditë pasi kishte filluar Asambleja e kësaj organizate vendosën të shtyhet aplikimi i Kosovës për anëtarësim deri në vitin tjetër. Ramush Haradinaj në fillim nuk e kishte përkrahur idenë që Kosova ta tërhiqte kërkesën e saj, mirëpo një ditë pasi kishte filluar Asambleja e Përgjithshme e INTERPOL-it mori vendim që Kosova të stepej nga ky proces, shkruan “Zëri”.
