Mazhoranca dhe opozita kanë arritur marrëveshjen për Reformën Zgjedhore.
Në zgjedhjet e ardhshme, do të ketë identifikim biometrik të të gjithë votuesve. Kjo do të thotë kushdo që do të shkojë të votojë, do të lërë edhe shenjën e gishtit në mënyrë që të mos ketë mundësi të votojë dy herë ose për persona të tjerë.
Palët kanë rënë dakord që depolitizimi i komisioneve zgjedhore të shtyhet. Mësohet se komisionet Politike do të vijojnë të jenë siç kanë qenë edhe në dy zgjedhjet e ardhshme, ato parlamentare dhe ato lokale.
Në përfundim të mbledhjes që ka zgjatur rreth 1 orë e 30 minuta, përfaqësuesit e opozitës, Oerd Bylykbashi dhe Petrit Vasili thanë se PS tentoi që të kapte komisionet zgjedhore, por pasi nuk ia dolën, u tërhoqën.
Të pranishëm ishin edhe ambasadorët që kanë luajtur një rol kyç për këtë reformë. Bëhet fjalë për ambasadoren e SHBA-së, Yuri Kim, ambasadorin e BE-së, Luigi Soreca, ambasadorin e Britanisë së Madhe, Dunan Norman e ndërsa i pranishëm në mbledhjen e sotme është edhe ambasadori i OSBE-së, Bernd Borchardt.
