Policia e Vlorës ka arrestuar një 36-vjeçar me rrezikshmëri të lartë shoqërore. Shtetasi me inicialet I. H., lëvizte me pistoletë nëpër qytet.
Forcat Operacionale pranë DVP Vlorë, në bashkëpunim me shërbimet e Komisariatit të Policisë Vlorë, gjatë operacionit në lagjen “1 Maji” në Vlorë, pranë një lokali kanë kapur dhe vënë në pranga shtetasin I. H.
36-vjeçari është me precedent të theksuar kriminal në fushën e krimeve ndaj personit. Gjatë kontrollit personal, në çantën e krahut iu gjet dhe iu sekuestrua në cilësinë e provës materiale 1 armë zjarri pistoletë model “Beretta”, me një krëhër me fishekë luftarak.
Njoftimi i policisë:
Finalizohet operacioni policor i koduar “FAST”. Operacioni nga Forcat Operacionale pranë DVP në bashkëpunim me Komisariatin e Policisë Vlorë. Kapet dhe vihet në pranga një person me rrezikshmëri shoqërore, i cili qarkullonte me armë zjarri me vete. Vihet në pranga 36-vjeçari, me precedent të theksuar kriminal në fushën e krimeve kundër personit. Sekuestrohet një armë zjarri pistoletë me një krëhër me fishekë luftarak.
Në vijim të punës për parandalimin e ngjarjeve kriminale, kapjen e personave në kërkim, atyre që merren me shpërndarje të lëndëve narkotike apo qarkullojnë me armë zjarri, bazuar në informacionet e marra në rrugë policore nga Forcat Operacionale pranë DVP Vlorë për një person me rrezikshmëri për komunitetin i cili qarkullonte me armë zjarri, është organizuar dhe finalizuar operacioni policor i koduar “Fast”.
Forcat Operacionale pranë DVP Vlorë në bashkëpunim me shërbimet e Komisariatit të Policisë Vlorë, gjatë operacionit, në lagjen “1 Maji” në Vlorë, pranë një lokali kanë kapur dhe vënë në pranga shtetasin I. H., 36 vjeç, banues në Vlorë, person me precedent të theksuar kriminal në fushën e krimeve ndaj personit.
Gjatë kontrollit personal, në çantën e krahut, iu gjet dhe iu sekuestrua në cilësinë e provës materiale, 1 armë zjarri pistoletë model “Beretta” me një krëhër me fishekë luftarak.
Materialet në ngarkim të tij iu referuan Prokurorisë Vlorë për veprën penale “Prodhimi dhe mbajtja pa leje e armë shpërthyese dhe municionit”.
