Pas akuzave të PD, që pretendon se kandidati socialist i dalë nga zgjedhjet e 30 qershorit është arrestuar në zonën e Siçilisë, Kreu i Bashkisë së Vaut të Dejës, Mark Babani, ka depozituar shenjat e gishtave në Institutin e Policisë Shkencore.
Sipas selisë blu, Babani ka qëndruar në burg deri më datën 6 Maj 1994, dhe më pas është dënuar dhe dëbuar nga shteti italian.
PD-ja ka publikuar dy ditë më parë dokumentet që dëshmojnë, sipas selisë blu, arrestimin e kreut të njësisë vendore të Vaut të Dejës. Në një deklaratë për mediat, Sekretari i Partisë Demokratike, Gazment Bardhi, është shprehur se Babani, duke përdorur emrin e rremë “Marq Babaj”, është arrestuar më datë 4 Prill 1994 në Itali, duke vjedhur makina. “Kandidati i Edi Ramës për Vaun e Dejës ka qenë pjesë e një grupi kriminal që vepronte në zonën e Siçilisë, dhe që kishte kryer disa vjedhje”, tha më tej Bardhi.
