Gjykata e Tiranës ka dhënë masat e sigurisë për 19 të arrestuarit në protestën e 16 shkurtit, ku la në burg edhe ish- kreun e Policisë Bashkiake të Tiranës, Florenc Hoxhën.
Ky vendim duket se ka prekur deputetët demokratë, të cilët janë indinjuar para kamerave.
Kreu i grupit parlamentar të PD-së, Edmond Spaho ka thënë asnjë nga ato për të cilën akuzohet qytetarët nuk është e vërtetë, ndërsa përmendi arrestimin e Florenc Hoxhës, i cili sipas tij është arrestuar në sy të familjarëve dhe fëmijëve.
“Të gjithë të pandehurit deklaruan se protestonin kundër qeverisë së Edi Ramës për një të ardhme më të mirë për fëmijët e tyre. Për fat të keq, asnjë fakt, asnjë provë për ato ç’ka i akuzojnë, gjoja prishjen e qetësisë, prishjen e forcave të rendit. Ndërkohë e vetmja prishje ishte kërpudha. Asgjë nuk u prish as forcat e rendit dhe as qetësia publike. E morën me forcë Florenc Hoxhën dhe e tërhoqën zvarrë në sy të familjarëve dhe fëmijëve. Të pandehurit kërkuan të merrnin pjesë në protestën ditën e enjte pavarësisht kësaj, ju ftojmë të merrni pjesë në protestë”, tha Spaho.
Edhe Enkelejd Alibeaj reagoi ashpër, teksa tha i revoltuar se “Rama duhet të tërhiqet zvarrë, njësoj si i ati”.
