Deputeti socialist Pjerin Ndreu, ka një koment në lidhje me arrestimin e dy ish-deputetëve të PS, Arben Ndoka dhe Arben Çukos. Pas mbledhjes së grupit të PS, ai është shprehur se ka rezerva për mënyrën si ka vepruar prokuroria dhe policia me këto raste.
Sipas tij, është vepruar me dy standarde në ndalimin e tyre. Ai ka kërkuar që të shihen me qartësi këto gjëra. Po kështu, Pjerin Ndreu ka nënvizuar se PS, nuk mbështet për asnjë arsye asnjë veprim të paligjshëm.
“Nuk marr përsipër të gjykoj provat, por kam rezerva për mënyrën skandaloze të veprimet, sjelljen skandaloze se si kanë vepruar me mënyrën e arrestimit. Dhe praktikimin e dy standardeve. Një grup qe quhet i parëndësishëm dhe merret prokuroria lokale, dhe një grup tjetër që merret Prokuroria e Krimeve te Rënda.
Duhet të shihen me qetësi këto gjera. Ne si force politike nuk mbështesim asnjë veprim të paligjshëm. Por mënyra e te vepruarit te prokurorisë dhe policisë në dy raste te ndryshme në Lezhë, është e habitshme. Të presim verdiktin e drejtësisë, e të flasim për të tjerat”, tha Pjerin Ndreu.
