Pas kërkesës së SPAK për arrestimin e Alqi Bllakos, kreu i grupit i parlamentar të PS, Taulant Balla tha për mediat se “nuk ndihet i gëzuar”.
Kryetari i grupit parlamentar të PS-së, Taulant Balla, u shpreh se si koleg nuk është i gëzuar nga vendimi, ndërsa shtoi se para drejtësisë duhet të vihet kushdo, pavarësisht se nga cili kamp vjen.
“Nuk jam i gëzuar për askënd. Një aspektin njerëzor të të qenurit koleg në Kuvend nga cilido krah qoftë personi. Në aspektin njerëzor nuk jam i gëzuar. Por forca udhëheqëse e PS për të çuar përpara Reformën në Drejtësi ka pasur një objektiv të vetë që drejtësia të funksionojë.
Ne do të vazhdojmë të punojmë në këtë drejtim, të palëkundur për të thelluar më tej efektet e reformës. Një gjë duhet të jetë e qartë për të gjithë. Brenda PS, ka vendosur një vijë të kuqe me këdo, sapo ndaj një përfaqësuesi, drejtësia kërkon ose vendos një masë për hetime. Natyrshëm që vija e kuqe është se PS nuk është mburojë për askënd. Kjo do të jetë një vijë e kuqe për këdo”, tha Balla.
Këshilli për Rregulloren në Kuvend do të mblidhet nesër në orën 18:00, për të shqyrtuar kërkesën e SPAK për arrestimin e deputetit Alqi Bllako. Emri i tij është mes 8 të akuzuarve të tjerë si pjesë e aferës së inceneratorëve.
