Këngëtarja amerikane Ariana Grande do të jetë sërish në Mançester. Këtë e konfirmojnë zëdhënësit e yllit të muzikës pop. Ata thonë se këtë herë Grande do zhvillojë një koncert bamirësie për nder të viktimave të sulmit vdekjeprurës së javës së kaluar.
Në koncerti që do të mbahet ditën e diel, me titullin “One Love Manchester”, do të jenë dhe artistë të tjerë të njohur si Justin Bieber dhe Katy Perry.
Në sulmin e 22 majit në dalje të ambienteve të “Manchester Arena” pak pas përfundimit të koncertit të Ariana Grandes, u vranë 22 vetë dhe u plagosën më shumë se 100 të tjerë. Shumë nga viktimat ishin vajza të reja, admiruese të këngëtares. Të tjerë ishin prindër që po prisnin fëmijët e tyre pas koncertit.
Policia ka identifikuar sulmuesin, 22 vjeçarin Salman Abedi, i lindur në Mançester. Po punohet ndërkohë që të zbardhen lëvizjet e tij në javët e fundit përpara sulmit, si dhe të bashkëpunëtorëve të tij.
Në lidhje me sulmin autoritetet kanë arrestuar më shumë se 10 persona, ndër ta vëllain dhe babain e Salman Abedit, në Libi javën e kaluar. Sipas një zëdhënësi të autoriteteve libiane, vëllai Hashim ishte në dijeni të planeve të Salman Abedit për të sulmuar.
