Nëna e djalit të dhunuar nga disa policë në zonën e Liqenit Artificial, Zaida Çobo, ka thënë se është ndjerë e tmerruar. Në një prononcimi në “News 24”, ajo ka zbuluar se pas shfaqjes së videos, menjëherë ka telefonuar drejtorin e Policisë, Ardi Veliun, por ai nuk i është përgjigjur thirrjes së saj. Po kështu, ka sqaruar opinionin publik se video që bëri publik Veliu, është marrë nga rrjetet e saj sociale. Po kështu, video është bërë në një prapaskenë filmi që ka realizuar.
“Jam ndjerë e tmerruar. E kam telefonuar drejtorin e Policisë, Ardi Veliun dhe ai nuk ma ka hapur telefonin. Veliu ka cënuar figurën time në mënyrë ekstreme. Kjo është skenë filmi. Video është bërë në një prapaskenë filmi që kam realizuar. Video është realizuar në vitin 2018. Gjendet në FB tim. I bie që ka gërmuar kaq shumë në rrjetet sociale. Nuk e kuptoj se me cfarë të drejte e publikon atë video. Çështjen do ta coj në gjykatë”, tha Zaida Çobo.
Ajo u shpreh se fëmija i saj ka qenë brenda orarit të përcaktuar nga qeveria, për të dalë jashtë banesës. “Nuk mund t’i quaj policë ata persona. Policët i kërkonin fëmijës sim kartën e identitetit, dhe ai tha se nuk e ka, sepse nuk i ka mbushur 18 vjec. Dua mbrojtje nga SHCBA, nga Avokati i Popullit, nga Shoqatat e të Drejtave të Fëmijëve. Është e pavërtetë që djali im të ketë dalë jashtë orarit të caktuar për Covid-19. Unë do kërkoj të drejtën e djalit tim deri në fund. Tani ndihet më mirë”, u shpreh ajo.
