Kristal Abazajt i janë dashur vetëm 40 sekonda për të ulur euforinë e Flamurtarit, pas fitores së marrë një javë më parë përballë Teutës në Vlorë. Një ngatërresë në zonë mes portierit Nurkovic dhe Mustës bëri që sulmuesi i Luftëtarit të dilte me portën e boshatisur dhe të shtynte topin në rrjetë me mjaft lehtësi.
Futbollisti më i ri i Anderlechtit të Belgjikës, vijoi të luftojë fort dhe në minutën e 33-të shënoi një supergol nga goditja e dënimit, duke bërë që pjesa e parë të përfundojë në avantazh të dy golave për skuadrën e Hasan Likës.
Flamurtari u zgjua në pjesën e dytë dhe rihapi takimin me anë të Stiljanovskit në minutën e 54’t ndërsa më pas krijoi edhe raste të tjera për të barazuar, por pa arritur t’ia dalë.
Minutat e mbetura ishin vërtetë spektakolare, pasi vlonjatët kërkuan me ngulm golin e barazimit, ndërsa futbollistët e Luftëtarit kundërsulmuan disa herë rrezikshëm. Pas kësaj jave, Luftëtari blindon pozitat në vendin e 3-të, me 4 pikë më tepër se Partizani ndjekës, ndërsa Flamurtari i jep fund ëndrrës për të siguruar një vend në Europë.
Partizani ka marrë një goditje të fortë nga Lushnja në transfertë, pasi ka barazuar 1-1, duke humbur edhe shpresën e Europës. “Të Kuqtë” nuk kanë arritur të përfitojnë nga përballja Skënderbeu-Kukësi, por as të mbajnë ritmin e Luftëtarit dhe këta të fundit shkëputen me 4 pikë.
Trajneri Ilir Gjyla mori një përgjigje mjaft pozitive nga emrat e rinj, të cilëve u besoi në këtë takim, ndërsa Dalipi kuptoi arsyen pse shumë teknikë kanë dështuar në drejtimin e Partizanit. Për statistikë, golat u shënuan nga Pepa në minutën e 69’, me 11-metërsh, ndërsa për Partizanin barazoi Batha në minutën e 89’. Kjo ndeshje do të krijojë shumë polemika pas asaj tërheqje në zonë të Asanit dhe arbitri nuk akordoi penallti, ndërsa për Lushnjën nuk nguroi pas një faulli në zonë.
