Një konflikt për ashensorin është kthyer në ‘mollë sherri’ mes ish-ministrit Arben Malaj dhe një ndërtuesi në Vlorë.
Malaj ka paditur në Prokurori ndërtuesin Sulo Shehu. Incidenti ka ndodhur pas një konflikti për përdorimin e ashensorit në pallatin të ndërtuar nga Sulo Shehu në Lugomare, në zonën e Ujit të Ftohtë në Vlorë, ku Malaj ka në pronësi të tij një apartament.
Përplasja mes tij dhe administratorit të pallatit ka nisur ku ky i fundit i ka kërkuar një shumë lekësh dy herë, për t’u pajisur me chipa për ashensorin.
Sipas Malajt, administratori i ka kërkuar para për shërbime që nuk ofrohen, dhe se nuk jepte dokumente për pagesën që duhet të bënte.
“Unë kam blerë një apartament te ndërtuesi Sulo Shehu, në brendësi përfshihej dhe si pronë e shërbim i përbashkët ashensori i pallatit që unë kam blerë hyrjen, e cila është në katin e katërt, hyrja me numër 18. Në lidhje me përdorimin e ashensorit, kam pasur konflikte me një person i cili është vetëdeklaruar si administratori i pallatit. Më bën presion për pagesat e pa justifikuara nga ana e tij. Kam për të thënë se unë personit në fjalë i kam dhënë 8.000 lekë të reja, pasi ai më ka dorëzuar dy çipat e aktivizuar, mbas tre javësh ky person më ka kërkuar diferencë…”, shkruan Malaj në kallëzim.
