Në prezantimin e projektit të Bashkimit Europian EU4LEA, për zbatimin e ligjit në Shqipëri, kreu i Strukturës së Posaçme, Arben Kraja, ka premtuar më shumë rezultate nga institucioni që ai drejton, ndërkohë që vendi ka nisur rrugën e anëtarësimit pas çeljes së negociatave. Ai theksoi se situata e kriminalitetit në vend kërkon reagim të fuqishëm, dhe se ka shumë hetime të rëndësishme në vijim. Bëhet fjalë për krimin e organizuar, pastrim e parave, korrupsionit. Arben Kraja garantoi se do të hetojnë në mënyrë objektive dhe të paanshme të gjitha rastet, dhe do japin rezultate që vijnë nga hetimi duke vlerësuar provat.
“Vendi ynë ndodhet në një fazë shumë të rëndësishme, që ka të bëjë me integrimin në BE. Institucionet e zbatimit të ligjit kanë një rol të rëndësishëm, se jemi në një stad pak më të lartë. Kërkohet dhe produkt nga institucioni që të jetë sa më cilësor, efektiv dhe sa më i prekshëm për publikun.
Duke përfshirë dhe situatën e kriminalitetit në Shqipëri, projekti është në kohën e duhur për të ndihmuar për të finalizuar ato objektiva.
SPAK është e konsoliduar si strukturë dhe në një fazë delikate të kapërcejë ato problemet e fillimit dhe të japë produktin e nevojshëm.
Hetuesit janë marrë të gjithë në punë, të gjithë janë tepër intensiv dhe tepër aktiv. Kemi shumë hetime të rëndësishme në vijm, për krimin e organizuar, pastrim e parave, korrupsionit, është momenti që të ecim përpara.
Niveli që ne kemi arritur ne kryejmë hetime njëkohësisht me vendet e BE. Projekti do jetë shumë ndihmë për forcimin e kapaciteteve të hetimit kryesisht. Dua të garantoj të gjithë që ne jemi serioz në punën që bëjmë, do hetojmë në mënyrë objektive dhe të paanshme të gjitha rastet, dhe do japim rezultatet që vijnë nga hetimi duke vlerësuar provat. Dua të garantoj krerët e projektit, ne do jemi kurdoherë bashkëpunues në arritjen e objektivave që ka projekti në fushën që prek SPAK, do jemi partnerë seriozë dhe kemi nevojë që të na ndihmoni. Bashkarisht besoj që do ecim përpara”, tha Kraja.
