Arabia Saudite hapi hapësirën e saj ajrore të premten për të gjithë transportuesit civilë, duke përfshirë të gjitha fluturimet për në dhe nga Izraeli, në një hap drejt normalizimit të marrëdhënieve midis dy kombeve ndërsa presidenti i SHBA-së Joe Biden bën një turne në Lindjen e Mesme.
Në një deklaratë të ndarë disa orë përpara se të fluturonte drejtpërdrejt nga Izraeli në Arabinë Saudite, Joe Biden përshëndeti vendimin e mbretërisë, duke thënë se ai mund të “ndihmojë në ndërtimin e vrullit drejt integrimit të mëtejshëm të Izraelit në rajon”.
Administrata Biden ka kërkuar prej muajsh të zyrtarizojë marrëveshjet e sigurisë dhe ekonomike midis Arabisë Saudite dhe Izraelit, në një përpjekje për të vendosur terrenin për një marrëveshje normalizimi midis dy vendeve.
Riadi besohet të ketë një marrëdhënie të fshehtë me Izraelin, por ende nuk i ka zbuluar zyrtarisht ato lidhje diplomatike. Në vitin 2020, kryeministri i atëhershëm izraelit Benjamin Netanyahu thuhet se fluturoi në Arabinë Saudite për një takim të fshehtë me liderin de fakto të mbretërisë, Princin e Kurorës Mohammed bin Salman – një pretendim që u mohua nga kryediplomati i Riadit.
Një normalizim i mundshëm mes Izraelit dhe Arabisë Saudite është cilësuar si “xhevahiri i kurorës” i marrëveshjeve midis shtetit hebre dhe botës arabe. Emiratet e Bashkuara Arabe, Bahreini, Maroku dhe Sudani normalizuan marrëdhëniet me Izraelin në vitin 2020, si pjesë e një vale marrëveshjesh në fund të mandatit të ish-presidentit Donald Trump.
Vendimi i mbretërisë shënon herën e parë që ajo ka lejuar përdorimin e pakufizuar të hapësirës ajrore të saj nga linjat ajrore izraelite për të fluturuar drejt dhe nga vendi. Në vitet e fundit, Arabia Saudite ka lejuar vetëm linjat ajrore izraelite që fluturojnë nga Tel Avivi në Emiratet e Bashkuara Arabe dhe Bahrein përmes hapësirës së saj ajrore.
Masa përmbys plotësisht ndalimin prej dekadash të mbifluturimeve izraelite në hapësirën ajrore saudite. Linjat ajrore izraelite që fluturonin drejt rrugëve aziatike si India dhe Kina, më parë duhej të bënin një rrugë të tërthortë rreth Arabisë Saudite që i shtoi orë të tëra udhëtimit.
Autoriteti i Përgjithshëm i Aviacionit Civil të Arabisë Saudite (GACA) tha të enjten në një deklaratë se kishte vendosur të hapte hapësirën e saj ajrore për të gjithë transportuesit ajror “që plotësojnë kërkesat e Autoritetit për fluturim”. Ai shtoi se vendi është i prirur “të përmbushë detyrimet e tij sipas Konventës së Çikagos të vitit 1944, e cila përcakton mosdiskriminimin midis avionëve civilë të përdorur në navigimin ajror ndërkombëtar”.
Biden u zotua të bëjë gjithçka që mundet “përmes diplomacisë së drejtpërdrejtë dhe angazhimit për të vazhduar avancimin e këtij procesi novator”.
Kryeministri izraelit Yair Lapid përshëndeti njoftimin saudit, të cilin ai e përshkroi si rezultat i një “rruge të gjatë të diplomacisë intensive dhe të fshehtë me Arabinë Saudite dhe Shtetet e Bashkuara”. Ai tha se vendimi ishte “vetëm hapi i parë” dhe premtoi se do të vijnë më shumë në rrugën e përmirësimit të marrëdhënieve.
Lapid gjithashtu falenderoi Biden dhe i uroi sukses në samitin e tij në Jeddah të shtunën. Presidenti amerikan do të takohet me Mbretin Salman dhe princin e kurorës të premten në mbrëmje.
Burimi i lajmit: CNN. Përshtatur nga Tirana Today
