Dyshohet për falsifikim dokumentesh, Gjykata e Apelit lë në fuqi vendimin për hetimin e anëtarit të Këshillit të Lartë Gjyqësor. Alban Toro, anëtar i KLGJ-së, do të hetohet nga Prokuroria e Posaçme kundër Krimit dhe Korrupsionit (SPAK), pasi akuzohet për falsifikimin e dokumenteve, që dorëzoi në Kuvend për t’u zgjedhur anëtar i KLGJ-së.
Pak kohë më parë, Gjykata e Posaçme urdhëroi SPAK të regjistrojë procedim penal për anëtarin e Këshillit të Lartë Gjyqësor, Alban Toro. Vendimi u mor nga gjyqtarja Ilirjana Olldashi, pas shqyrtimit të ankimit të bërë nga shoqata e avokatëve Antikorrupsion. Sipas shoqatës që bëri fillimisht kallëzimin, dyshohet se Toro ka gënjyer Kuvendin për punën e tij si avokat dhe u zgjodh në Këshillin e Lartë Gjyqësor në kundërshtim me ligjin.
Sipas ligjit, anëtari i KLGJ-së duhet të ketë dhjetë vite pune avokat pa ndërprerje. Duke iu referuar të dhënave të qendrës kombëtare të biznesit, rezulton se Alban Toro nga data 2 Mars 2010 deri në datën 20 shtator 2011, e ka pezulluar ushtrimin e aktivitetit si avokat për afro 1 vit e gjysmë. Por kjo ndërprerje nuk është pasqyruar në dokumente, ç’ka ka nisur edhe hetimet për falsifikim.
