Edhe pse janë bërë shumë protesta nga shoqëria civile dhe nga qytetarë vendas dhe të huaj për të mos lejuar ndërtimet e hidrocentraleve në Valbonë, sistemi i drejtësisë duket se nuk ndan të njëjtin mëndim. Gjykata e Apelit në Shkodër nuk ka pranuar kërkesën për ndalimin e punimeve për ndërtimin e tre hidrocentrale në lumin Valbona.
Apeli i Shkodrës la sot në fuqi vendimin e Gjykatës së Tropojës, e cila i lë dorë të lirë punimeve për ndërtimin e HEC-eve mbi Valbonë.
Në sqarimin e vet Gjykata shprehet se është shkelur procedura nga ana e përmbaruesit Eduard Mrishaj, e kësisoj ai duhet të bëjë rekurs në Gjykatën e Lartë.
Me këtë vendim, firma që kryen punimet e HEC-it mbi Valbonë vazhdon punën deri në një vendim tjetër.
Banorët dhe aktivistët që erdhën nga Tropoja duke protestuar u shprehën kundër ndërtimit të hidrocentraleve dhe deklaruan se do vijojnë të kundërshtojnë edhe me dhunë, sepse nuk shohin mundësi të tjera përmes rrugëve ligjore.
Sipas tyre firma që po nderton hidrocentralet ka blerë sistemin e drejtësisë në Shqipëri sepse këto vendime nuk janë rastësore.
Tashmë një kompani e tretë sipas banorëve ka bërë aplikim edhe për hidrocentrale të tjera.
