Autoritetet shqiptare i kanë ndaluar hyrjen në Shqipëri dy shtetasve iranianë. Mësohet se Afshin Kalantarit dhe Batool Soltani u është refuzuar hyrja në momentin që ata po kalonin në aeroportin e Rinasit, dhe u është kërkuar kthimi për në Gjermani, vendi nga kishin udhëtuar për në Shqipëri. Ata kanë refuzuar ta bëjnë këtë, dhe janë mbajtur 72 orë në aeroport, ndërsa më pas janë deportuar në Gjermani.
Autoritetet shqiptare kanë kryer deportimin me pretendimin se janë një kërcënim serioz për vendin, 72 orë pas mbërritjes në Rinas, ndërsa e njëjta përgjigje u është dhënë edhe autoriteteve gjermane, nga ku janë kthyer.
Policia e kufirit ka njoftuar Drejtorinë e Antiterrorit në Policinë e Shtetit, menjëherë sapo dy iranianët kanë paraqitur një ftesë nga shoqata ASILA e krijuar për të ndihmuar iranianët që jetojnë në Shqipëri. Pjesëtarë të kësaj shoqate janë ata persona, të cilët kanë dezertuar MEK. Në ftesë thuhej se të dy këta shtetas do të merrnin pjesë një ceremoni të mikut të tyre iranian, i ardhur në Shqipëri nga Gjermania. Dy javë më parë me urdhër të prokurorëve të SPAK, zyrat e ASILA u kontrolluan prej oficerëve të BKH. Shoqata ASILA është vënë nën hetim për lidhje me regjimin e Iranit, dhe veprimeve që synojnë cenimin e sigurisë të anëtarëve të MEK strehuar në vendin tonë. Ndalimi i dy iranianëve me shtetësi gjermane, vjen një javë pas anulimit të samitit vjetor të anëtarëve të MEK, për arsye sigurie, pas kërcënimeve për një sulm terrorist të mundshëm. Anëtarët e MEK pranuan kërkesën e autoriteteve shqiptare, për të shtyrë për një moment të dytë samitin.
