Pas takimit më ministrin e brendshëm Fatmir Xhafaj, Presidenti i Agjencisë Kombëtare Anti-korrupsion Raffaele Cantone, ka deklaruar se për të luftuar korrupsionin në Shqipëri, nuk mjafton krijimi vetëm i prokurorisë së re, por sipas tij, duhen ndërmarrë veprime rrënjësore në administratë dhe duhet krijuar një punë cilësore.
Në një intervistë për Report TV, ai tha se pa një reformë në administratë është e pamundur që të kemi një efiçencë për këtë proces.
“Ideja se mund të jetë vetëm drejtësia është ajo që mund të ndryshojë Administratën Publike përmes veprimeve penale, doli se ishte e gabuar, për shembull me Tanxhentopolin, sepse Tanxhentopoli në Itali nxori fakte të mëdha korrupsioni, por nuk i shfarosi”-tha Cantone.
Ndërkohë Presidenti i Antikorrupsionit italian, nënvizoi se pa një hap të tillë, mund të kemi një spostim të vendit të korrupsionit,ndërsa përpiqet të krijojë skemën dhe tipologjinë për t’i shpëtuar përndjekjes, ai la të kuptohet se pastrimi i administratës përmes reformave është veprimi i duhur, por duhet vepruar në kohë sa nuk është bërë dëmi.
“Nëse nuk futen mekanizma brenda administratës që të shmangin ndodhinë e fakteve të korrupsionit, veprimet penale nuk janë efikase, sepse niveli i korrupsionit është në gjendje të spostohet në vende të tjera me më pak vëmendje edhe të ndryshojë tipologjinë për të shmangur përndjekjen. Prandaj është e nevojshme të ndërhyhet me një drejtësi efikase, por është e nevojshme të ndërhyhet duke krijuar kushtet që korrupsioni të mos ndodhë, sepse drejtësia ndërhyn gjithnjë më pas, kur tashmë fakti ka ndodhur e dëmi është bërë”-theksoi ai.
