Phoebe Ann Moses, e njohur më shumë si Annie Oakley, ishte një qitëse e famshme amerikane. Ajo ra në sy për aftësinë e saj në gjuajtjet e sakta me pushkë, që në vitet e hershme të adoleshencës. Falë talentit të rrallë, ajo mbështeti financiarisht edhe familjen e saj, duke u angazhuar në lojërat që zhvilloheshin pranë shtëpisë së saj.
Njëherazi ajo punonte si shitëse në një dyqan ushqimor të Vëllezërve Katzenberger në Grinvil, Ohajo. Annie ishte një gjuajtëse e talentuar. Madje me paratë që arriti të fitojë, ia doli të shlyejë kredinë prej 200 dollarësh për shtëpinë e nënës së saj. Në vitin 1875, kur Annie ishte vetëm 15-vjeçe, ajo u bë pjesë e një gare mes qitësish, duke pasur përballë kampionin e njohur Frank Butler, të cilin arriti ta mposhtë.
Butler u dashurua me të, dhe ata u martuan vitin që pasoi. Çifti nisi të udhëtojë në mbarë SHBA-në, dhe të çudiste spektatorët me shënjestrën e pabesueshme që kishin. Në vitin 1885, Buffalo Bill punësoi Annie dhe burrin e saj në “Wild West Show”, në të cilin ata u angazhuan për 16 vjet me radhë.
Ata dhanë shfaqje në të gjithë Shtetet e Bashkuara, dhe më pas në mbarë Evropën. Annie ishte ylli i shfaqjes, teksa Frank punonte si menaxher dhe asistent i saj. Në 1890, Annie ishte duke performuar në kryeqytetin e Gjermanisë, Berlin. Atë natë në mesin e audiencës ndodhej edhe Friedrih Vilhelm II, perandori i fundit gjerman (Kajzeri).
Ai ishte një fans i madh i shfaqjeve të Oakley, dhe kishte ndjekur më herët disa shfaqje të tilla. Në një moment gjatë shfaqjes, Annie i kërkoi një vullnetari të pranonte të rrezikonte jetën e tij, duke mbajtur një cigare të ndezur në gojë, të cilën ajo do të përpiqej ta qëllonte në majë për ta fikur.
Ajo e bënte rregullisht këtë lojë gjatë shfaqjeve të saj. Por deri atë ditë askush nuk ishte aq i guximshëm sa të pranonte këtë sfidë, përveç bashkëshortit të saj, që do të dilte gjithmonë si vullnetar në atë provë të guximshme. Por atë mbrëmje doli një vullnetar, dhe ai ishte vetë Kajzeri.
Ai ishte personi i fundit, që Annie priste të dilte si vullnetar në atë numër të shfaqjes. Por meqë nuk kishte zgjidhje tjetër, e ftoi në skenë monarkun gjerman. Annie e dinte shumë mirë, që ai ishte një nga burrat më të pushtetshëm të Evropës, dhe që jeta e tij ishte pikërisht në duart e saj.
Kur kajzeri vendosi një cigare në gojë dhe e ndezi, ajo ngriti pushkën e saj “Colt.45”, mori shenjë dhe tërhoqi këmbëzën. Plumbi qëlloi në shenjë, dhe arriti të godasë majën e cigares duke e fikur atë. Sikur plumbi të godiste pak centimetra më tej në gojën e Kajzerit, ajo ngjarje do të kishte ndryshuar me siguri rrjedhën e historisë botërore.
Disa vite më vonë, Kajzeri i ri luajti një rol të madh në fillimin e Luftës së Parë Botërore. Siç raportohet nga BBC, Kajzeri ishte një besimtar i madh në rritjen e fuqisë së forcave të armatosura gjermane, veçanërisht marinës gjermane. Ai e vuri jo pak nën presion Britaninë e Madhe me ekspansionin e tij detar, si dhe përmes një politikë agresive të kolonializmit gjerman.
Vilhelmi II mbështeti ndërkohë Boerët në Afrikën e Jugut, në luftën e tyre kundër britanikëve. Pas vrasjes së Arkidukës austriak Franc Ferdinandit në Sarajevë në vitin 1914, Kajzeri i inkurajoi austriakët të kenë një qasje të ashpër ndaj Serbisë, duke i premtuar mbështetjen e plotë të Gjermanisë në rastin e një lufte.
Nëse Oakley do të kishte vrarë gabimisht Kajzerin atë natë në Berlin, ndoshta nuk do të kishte pasur asnjë Luftë të Parë Botërore. Dhe meqë ajo luftë, ishte shkaku kryesor i shpërthimit të Luftës së Dytë Botërore 20 vjet më pas, me gjasë nuk do të kishte pasur as edhe një Luftë të Dytë Botërore.
Sikurse raporton e përditshmja amerikane “The New York Times”, më vonë Annie Oakley e kuptoi gabimin që kishte bërë. Pas fillimit të Luftës së Parë Botërore, ajo i shkroi personalisht Kajzerit, duke i kërkuar ta përsërisnin lojën e dikurshme. Por ai nuk iu përgjigj./ TIRANA TODAY
