Cristiano Ronaldo që pas transferimit në merkaton e verës është kthyer në një nga lojtarët më të rëndësishëm të Juventusit. Ai kryeson listën e golashënuesve në Serie A. Bardhezinjtë janë në ankth sa i përket sfidës ndaj Napolit pasi Ronaldo mund ta humbasë për një problem në kaviljen e majtë.
“Ylli” portugez është stërvitur veçmas në seancën e kësaj të mërkure, por do t’u nënshtrohet ekzaminimeve të mëtejshme para se të merret vendimi përfundimtar. Sipas të gjitha gjasave, CR7 do ta ndjekë nga televizori takimin e “San Paolos”.
Juventusi nuk rrezikohen nga Napoli në garën për titull edhe nëse e humbet këtë sfidë, pasi diferenca është plot 13 pikë.
Për bardhezinjtë do të ishte një gafë e rëndë nëse lojtari portugez do të rrezikonte ndeshjen e kthimit me Atleticon e Madridit në Champions.
