Ambasadorja e Shteteve të Bashkuara të Amerikës, Yuri Kim, ka reaguar pas ankimimit që Operacioni Ndërkombëtar i Monitorimit bëri për drejtuesen e Prokurorisë së Tiranës Elisabeta Imeraj, duke kërkuar rishikimin e vendimit dhe largimin e saj nga sistemi i drejtësisë. Në një reagim në Twitter, ambasadorja amerikane thotë se tani është momenti për të parë nëse do të jepet një vendim i guximshëm për sistemin e ri të drejtësisë, apo do të ketë përpjekje për të penguar Vettingun.
Reagimi i Yuri Kim
Në përputhje me rolin e tij kushtetues në procesin e verifikimit, vëzhguesit nderkombetare dje u rekomanduan Komisionerëve Publikë që të apelojnë vendimin e Komisionit të Pavarur të Kualifikimit për një çështje të rëndësishme.
Të gjithë duhet të shikojmë nga afër se çfarë do ndodhë më pas.
A do të jetë përgjigjje për të treguar guxim dhe integritet ne favor të dhënies drejtësi apo, siç e kemi parë shumë shpesh në të kaluarën, për të devijuar drejtësinë duke sulmuar procesin e vettingut dhe duke shpifur mbi vëzhguesit ndërkombëtarë?
A do t’i shërbejë media publikut dhe a do ta mbulojnë këtë çështje me integritet, apo do të marrin telefonata dhe do të pranojnë të qëndrojnë të heshtur dhe të verbër?
Është koha të tregojmë guxim dhe integritet.
Koha për të thyer modelet e vjetra që dëmtojnë Shqipërinë. Koha për të ecur përpara, hap pas hapi. SHBA do te jenë me ju.
Zbardhet vendimi i KPK për Elisabeta Imerajn, komisionerët rrëzojnë pretendimet e ONM
Komisioni i Pavarur i Kualifikimit ka zbardhur dje vendimin për konfirmimin në detyrë të Kryeprokurores së Tiranës, Elisabeta Imeraj. ONM akuzon Imerajn se ka përgjuar vëzhguesit e saj dhe se divorci i saj nga bashkëshorti ishte fiktiv.
KPK i ka hedhur poshtë këto akuza, duke u shprehur se ONM nuk ka paraqitur asnjë fakt konkret që të mbështesë pretendimet e saj. Në përfundim, Komisioni vendosi që të konfirmojë në detyrë prokuroren Imeraj.
“Lidhur me këtë gjetje dhe pas përgjigjeve dhe shpjegimeve të dhëna nga subjekti në rezultatet e hetimit, Komisioni nuk konstatoi shkelje të kryera nga subjekti i rivlerësimit në kundërshtim me ligjin. Nga asnjë institucion ligjzbatuese në Shqipëri nuk rezultoi asnjë lloj e dhëne, prove apo indicie që të lidhë subjektin e rivlerësimit me pretendimin e ngritur”, konstaton KPK.
Sa u përket përgjimeve të pretenduara nga ONM, Komisioni konstatoi se nuk ka asnjë foto, por asnjë të dhënë tjetër që të tregojë se Imeraj ka përgjuar vërtet vëzhguesin e ONM. Prandaj, KPK ka dalë në përfundimin se këto akuza mbeten vetëm pretendime, që nuk kanë arritur të vërtetohen nga denoncuesi.
“Nga hetimi administrativ nuk rezultoi të administrohet asnjë fotografi, apo përgjim për ish -vëzhguesin, dhe as rezulton që subjekti i rivlerësimit të ketë njohuri në lidhje me to. Pretendimet e bazuara në letrën e Rr. Sh, me gjetjet e dërguara nga ONM mbeten pretendime të shprehura pa asnjë të dhënë provuese”, thuhet në vendim.
