Një 38-vjeçar shqiptar, i identifikuar si Ditran Hoxha tentoi të shpëtonte nga policia britanike duke u hedhur nga çatia, por theu këmbën.
Shqiptari, i cili kishte shkuar në Angli në rrugë të paligjshme, u burgos për 30 muaj. Gjatë një kontrolli në banesën e tij, policia zbuloi një fermë masive kanabisi, e cila mund t’u kishte sjellë fitime tregtarëve të drogës deri në 1 milionë paund. Hoxha kishte mbjellë më shumë se 600 bimë, ndërsa ambientet ishin të pajisura me kanale ventilimi dhe sisteme ngrohjeje.
Prokurori Michael Smith tha se oficerët që ekzekutuan zbuluan që kati përdhe ishte përdorur për të ruajtur ushqimin e bimëve, ndërsa ishin të instaluara katër kaseta të mëdha uji, përcjell Panorama.
Po ashtu, Smith pohoi se ferma kishte potencialin për të prodhuar sasi shumë të konsiderueshme kanabisi.
Hoxha, i cili do të përballet me dëbimin në fund të dënimit, u deklarua fajtor për një akuzë të prodhimit të kanabisit.
