Një foshnjë e porsalindur në Angli është bërë pacienti më i ri në botë, që ka rezultuar pozitiv me koronavirus.
Nëna e fëmijës u dërgua me urgjencë në spital ditë më parë, pasi dyshohej se vuante nga pneumonia. Rezultati i analizave se ajo ishte infektuar nga koronavirusi, u bë i ditur vetëm pasi ajo solli në jetë foshnjën.
Nënë e bir po trajtohen në spitale të veçanta, pasi gjendja e nënës është më e keqe se ajo e foshnjës.
I porsalinduri po mjekohet në Spitalin North Middlesex ku lindi, ndërsa nëna u transferua në një spital të specializuar për infeksione.
Pasi mjekët mësuan për rezultatin pozitiv të nënës, ata vendosën menjëherë të testojnë edhe foshnjën.
Mjekët po përpiqen të përcaktojnë se si i porsalinduri e ka marrë virusin, qoftë përmes mitrës, ose gjatë lindjes.
Zyrtarët kanë thënë se gratë shtatzëna dhe foshnjat janë në rrezik të ulët nga koronavirusi dhe ka të ngjarë të përjetojnë vetëm simptoma të buta.
Situata në Mbretërinë e Bashkuar sa vjen edhe përkeqësohet, teksa vetëm në 24 orët e fundit janë raportuar më shumë se 200 raste të reja me koronavirus.
Deri më tani raportohet për rreth 800 të infektuar, ndërsa numri i vdekjeve në total ka shkuar në 11.
Ministri i Shëndetësisë i Uellsit deklaroi se 20,000 njerëz mund të vdisnin në Uells nga koronavirusi vdekjeprurës.
