Kancelarja gjermane Angela Merkel është shpallur si gruaja më e fuqishme në botë. Revista ‘Forbes’ ka publikuar emrat e grave më të fuqishme në botë për 2020. Në krye të listës për këtë vit qëndron kancelarja gjermane, Angela Merkel, e pasuar nga presidentja e Bankës Qendrore Evropiane, Christine Lagarde.
Në pesë vendet e para bëjnë pjesë edhe nën-presidentja e zgjedhur amerikane, Kamala Harris, presidentja e Komisionit Evropian, Ursula von der Leyen dhe filantropja amerikane, Melinda Gates.
“Lideret e listës së 100 grave më të pushtetshme në botë e revistës ‘Forbes’, luajnë rol tejet të rëndësishëm në të përcaktuarit e asaj se si do të duket bota pas pandemisë.
Fuqia e tyre kalon përtej fushave ekonomike dhe politike, për të transformuar industrinë dhe për të zgjidhur çështjet më urgjente shoqërore. Fuqia e tyre për të na çuar përpara, nuk ka qenë kurrë më e nevojshme”, thuhet në deklaratën e revistës që ka renditur emrat. Pjesë e listës së dhjetë femrave më të fuqishme në botë, po sipas ‘Forbes’ janë: Mary Barra, Nancy Pelosi Ana Patricia Bioton, Abigail Johnson dhe Gail Bourdreaux.
